نیویارک میں 11 ستمبر حملوں کی 24ویں برسی کی تیاریاں

نیویارک جمعرات کو 11 ستمبر 2001 کے ہولناک دہشت گرد حملوں کی 24ویں برسی منانے کے لیے تیار ہے، جن میں تقریباً 3 ہزار افراد جان کی بازی ہار گئے تھے اور جس نے ہمیشہ کے لیے امریکہ کو بدل دیا۔

یادگاری تقریبات مین ہٹن کے گراؤنڈ زیرو پر ہوں گی جہاں ورلڈ ٹریڈ سینٹر کے جڑواں ٹاورز کو ہائی جیک شدہ طیاروں سے تباہ کیا گیا تھا۔ ایک اور طیارہ واشنگٹن میں امریکی دفاعی ہیڈکوارٹر پینٹاگون سے ٹکرایا تھا، جبکہ فلائٹ 93 پنسلوینیا میں اس وقت گر کر تباہ ہوا جب مسافروں نے ہائی جیکروں پر قابو پا لیا تھا۔

امریکی نائب صدر جے ڈی وینس ان تقریبات میں شریک ہوں گے، تاہم اس بار یہ موقع شہر اور ملک میں بڑھتی ہوئی سیاسی تقسیم کے پس منظر میں آیا ہے۔ نیویارک کی میئرشپ کے غیر معمولی انتخابات میں سوشلسٹ ڈیموکریٹ امیدوار زہران ممدانی سابق گورنر اینڈریو کومو اور موجودہ میئر ایرک ایڈمز کے خلاف میدان میں ہیں۔

تازہ سروے کے مطابق زہران ممدانی 22 پوائنٹس کی سبقت کے ساتھ آگے ہیں۔ صدر ڈونلڈ ٹرمپ نے انہیں بارہا کمیونسٹ پاگل قرار دیا ہے جبکہ ایک ریپبلکن قانون ساز نے ان کی ملک بدری کا مطالبہ بھی کیا ہے۔ یہ واضح نہیں کہ ٹرمپ اس سال کی تقریب میں شریک ہوں گے یا نہیں۔

امریکہ حالیہ مہینوں میں سیاسی تشدد کی لہر کا شکار ہے، جس میں قدامت پسند انفلوئنسر چارلی کرک کا قتل اور ایک ڈیموکریٹ رکن اسمبلی اور ان کے شوہر کی ہلاکت شامل ہیں۔

نیویارک میں صبح 8:46 پر، یعنی اس وقت جب فلائٹ 11 نارتھ ٹاور سے ٹکرائی تھی، ایک منٹ کی خاموشی اختیار کی جائے گی۔ گرجا گھروں میں گھنٹیاں بجیں گی جبکہ لواحقین گراؤنڈ زیرو پر جان بحق افراد کے نام پڑھیں گے۔

سرکاری ہلاکتوں کی تعداد 2,977 بتائی گئی ہے جس میں طیاروں کے مسافر و عملہ، ورلڈ ٹریڈ سینٹر کے متاثرین، فائر فائٹرز اور پینٹاگون کا عملہ شامل ہے۔ اس میں 19 القاعدہ ہائی جیکرز شامل نہیں ہیں۔