ایل ایس ایم کو فوری توجہ درکار

ادارہ شماریات کے مطابق کے مطابق جون 2025 میں لارج اسکیل مینوفیکچرنگ (ایل ایس ایم) صنعتوں کی پیداوار میں سالانہ بنیاد پر (جون 2024 کے مقابلے میں) 4.14 فیصد اضافہ ریکارڈ کیا گیا، جب کہ ماہانہ بنیاد پر (مئی 2025 کے مقابلے میں) 3.67 فیصد کمی دیکھی گئی۔

یہ اعدادوشمار کئی سنجیدہ سوالات کو جنم دیتے ہیں کیونکہ:(i)مالی سال 2024-25 میں ایل ایس ایم کی اوسط سالانہ نمو گزشتہ سال کے مقابلے میں منفی 0.74 فیصد رہی،(ii)فنانس ڈویژن کی جولائی 2025 کی ماہانہ رپورٹ کے مطابق جولائی تا مئی 2025 میں ایل ایس ایم کی شرح نمو منفی 1.21 فیصد تھی،(iii) اگر جون 2025 میں منفی رجحان واقعی بڑھا جیسا کہ پی بی ایس نے ظاہر کیا ہے تو جولائی تا جون 2025 کی اوسط شرح نمو جولائی تا مئی کی اوسط سے کم کیوں ہے؟

یہی وہ سوالات ہیں جنہوں نے بلاشبہ آئی ایم ایف کو اکتوبر 2024 میں یہ بیان دینے پر مجبور کیا کہ جی ڈی پی کے تقریباً ایک تہائی حصے پر مشتمل شعبوں کے اعدادوشمار میں سنگین خامیاں موجود ہیں، جب کہ گورنمنٹ فنانس اسٹیٹکس (جی ایف ایس) کی تفصیلات اور اعتبار پر بھی سوالات اٹھتے ہیں۔

حکام ان کمزوریوں کو دور کرنے کو ترجیح دے رہے ہیں اور آئی ایم ایف کی تکنیکی معاونت سے جی ایف ایس اور نئے پروڈیوسر پرائس انڈیکس پر کام جاری ہے۔ پاکستان بیورو آف اسٹیٹکس آئندہ قومی اکاؤنٹس کو مالی سال 2026 کی بنیاد پر ری بیسنگ سے پہلے چار بڑے سروے کا فیلڈ ورک جلد مکمل کرے گا۔ یہ کام گزشتہ ماہ شروع ہو چکا ہے اور جون 2026 تک مکمل ہونے کی توقع ہے، جس کے بعد اعدادوشمار کو زیادہ مستند اور قابلِ اعتبار قرار دیا جا سکے گا۔

حکومت، بالخصوص معاشی ٹیم پر دباؤ تھا کہ ایل ایس ایم میں مثبت نمو دکھائی جائے کیونکہ یہ شعبہ پیداوار بڑھنے کی صورت میں روزگار کے مواقع پیدا کرنے اور مہنگائی کم کرنے کی صلاحیت رکھتا ہے۔ تاہم کووِڈ-19 کے آغاز (2020) سے ایل ایس ایم مسلسل منفی نمو کا شکار ہے، سوائے مالی سال 2021-22 کے، جس کی وجہ پیداوار میں حقیقی اضافہ نہیں بلکہ زیادہ فروخت کے باعث ذخائر میں کمی تھی۔

معاشی ٹیم پر الزام لگایا گیا کہ جی ڈی پی کی مسلسل کم شرح نمو — جو خطے کے دیگر ممالک کے مقابلے میں نصف رہی — اس بات کا نتیجہ ہے کہ وہ آئی ایم ایف کو سخت مالیاتی اور مالی پالیسی شرائط کو بتدریج ختم کرنے پر قائل نہ کر سکے جو معاشی نمو کے لیے رکاوٹ سمجھی جاتی ہیں۔

یقیناً جون 2024 میں ڈسکاؤنٹ ریٹ 21 فیصد سے کم ہوکر جون 2025 میں 11 فیصد تک آ گیا، مگر یہ شرح اب بھی خطے کے ممالک کے مقابلے میں دگنی ہے اور تنہا معیشت کے پھیلاؤ کے لیے کافی نہیں۔

مزید برآں، مالیاتی پالیسی اب بھی سخت ہے اور بالواسطہ ٹیکسز پر انحصار جوں کا توں برقرار ہے — جن کا بوجھ غریب طبقے پر 75 سے 80 فیصد تک زیادہ پڑتا ہے — اور یہی عوامل غربت کی شرح کو بڑھا کر 44.87 فیصد تک لے گئے ہیں۔

حکومت کی تشویش میں اضافہ کرنے والا ایک اور پہلو یہ ہے کہ ایل ایس ایم کے کئی شعبوں سے مذاکرات جاری ہیں تاکہ ان کی مسابقتی صلاحیت بڑھائی جاسکے، جس کے لیے پیداواری لاگت جیسے یوٹیلیٹی نرخ، درآمدی خام مال اور قرض پر شرحِ سود کم کرنے پر غور کیا جا رہا ہے۔

حکومت اب ماضی کی طرح ٹیکس دہندگان کے پیسے سے ان صنعتوں کو سہارا نہیں دے سکتی کیونکہ آئی ایم ایف نے اکتوبر 2024 میں واضح کیا تھا کہ حکومتی مداخلت — قیمتوں کے تعین میں (زرعی اجناس، ایندھن، بجلی، گیس) اور بلند ٹیرف و نان ٹیرف تحفظات کے ذریعے — مخصوص گروپوں یا شعبوں کے حق میں پلیئنگ فیلڈ جھکا دیتی ہے۔

اس تمام تعاون کے باوجود کاروباری شعبہ معیشت کی ترقی کا محرک بننے میں ناکام رہا جبکہ مراعات نے مسابقت کو کمزور اور وسائل کو مستقل طور پر غیر مؤثر صنعتوں میں قید رکھا۔

خلاصہ یہ ہے کہ لارج اسکیل مینوفیکچرنگ کا شعبہ اب بھی دباؤ میں ہے اور اس میں بہتری کے لیے مالیاتی پالیسی کو خطے کے دیگر ممالک کے مقابلے میں نرم کرنے اور مالی نظم و ضبط (فِسکل پالیسی) کو بھی سختی سے نکال کر نرمی کی جانب لانے کی ضرورت ہے، جبکہ فی الحال اس کے برعکس سخت اقدامات میں اضافے کے آثار نظر آ رہے ہیں۔

اب تک کوئی ثبوت موجود نہیں کہ آئی ایم ایف اپنی سخت شرائط میں نرمی پر آمادہ ہے، لہٰذا امکان ہے کہ یہ شعبہ بدستور حکومت کے اندرونی اور بیرونی قرضوں پر انحصار کے باعث یرغمال رہے گا۔

کاپی رائٹ بزنس ریکارڈر 2025