کمبوڈیا اور تھائی لینڈ کے درمیان مستقل جنگ بندی کیلئے ملائیشیا میں اہم مذاکرات

کمبوڈیا اور تھائی لینڈ کے اعلیٰ عسکری حکام نے جمعرات کو ملائیشیا میں ایک اجلاس کا آغاز کیا جس کا مقصد حالیہ سرحدی جھڑپوں کے بعد جنگ بندی کو مستقل بنانے کے لیے اقدامات کو حتمی شکل دینا ہے۔ یاد رہے کہ جولائی کے آخر میں بغیر کسی شرط کے جنگ بندی کے ساتھ ختم ہونے والی ان پرتشدد جھڑپوں کا دورانیہ پانچ دن تھا۔

جنوب مشرقی ایشیائی ہمسایہ ممالک کے درمیان گزشتہ مہینے دہائی سے زائد عرصے کے بعد سب سے شدید لڑائی ہوئی، جس میں توپوں کی گولہ باری اور لڑاکا طیاروں کی بمباری شامل تھی۔ اس لڑائی میں کم از کم 43 افراد جان سے گئے جبکہ دونوں جانب 3 لاکھ سے زائد افراد بے گھر ہوئے۔

چین اور علاقائی تنظیم آسیان کے چیئرمین ملک، ملائیشیا، کی سفارتی کوششوں کے باوجود جھڑپیں جاری رہیں، جنہوں نے دونوں فریقین سے تحمل کا مظاہرہ کرنے کی اپیل کی تھی۔

تاہم کمبوڈیا اور تھائی لینڈ کے رہنما اُس وقت مذاکرات کی میز پر آئے جب امریکی صدر ڈونلڈ ٹرمپ نے انہیں خبردار کیا کہ اگر امن قائم نہ ہوا تو امریکی ٹیرف مذاکرات آگے نہیں بڑھیں گے۔ یہ انکشاف رائٹرز کی خصوصی رپورٹ میں کیا گیا۔

کمبوڈین وزیر دفاع تیا سیہا اور تھائی لینڈ کے قائم مقام وزیر دفاع نتافون نرکفانِت کو کوالالمپور میں ملائیشیا کی مسلح افواج کے صدر دفتر میں ملاقات کرنی ہے۔

نتافون نے مذاکرات سے قبل جاری بیان میں کہا کہ دونوں ممالک سرحدی تنازعات کے حل، اپنی افواج کے درمیان اعتماد کی بحالی، اور کشیدگی کم کرنے اور عام شہریوں کے تحفظ کے لیے جنگ بندی پر اتفاق کریں گے۔

یہ شرائط کوالالمپور میں تین دن کے مذاکرات کے دوران تیار کی گئیں، اور چوتھے دن انہیں چین اور امریکا کے مبصرین کی موجودگی میں حتمی شکل دی جائے گی۔

تھائی لینڈ اور کمبوڈیا کے درمیان 817 کلومیٹر (508 میل) طویل زمینی سرحد کے غیر طے شدہ حصوں پر کئی دہائیوں سے تنازع چل رہا ہے، جسے پہلی بار 1907 میں فرانس نے نقشہ بند کیا تھا، جب یہ خطہ اس کی نوآبادی ہوا کرتا تھا۔