آئی ایم ایف کا پاکستان کی آئندہ مالی سال میں شرح نمو 3.6 فیصد رہنے کا تخمینہ، حکومتی ہدف 4.2 فیصد مقرر

بین الاقوامی مالیاتی فنڈ (آئی ایم ایف) نے اپنی تازہ ترین رپورٹ ”ورلڈ اکنامک آؤٹ لک اپڈیٹ: غیر یقینی صورتحال میں کمزور عالمی بحالی“ میں پاکستان کے لیے مالی سال 2025-26 کے دوران جی ڈی پی کی شرح نمو 3.6 فیصد رہنے کی پیشگوئی کی ہے، جو حکومت کے مقرر کردہ 4.2 فیصد ہدف سے کم ہے۔

مزید برآں فنڈ نے مالی سال 2024-25 کے لیے شرح نمو کا تخمینہ 0.1 فیصد بڑھا کر 2.7 فیصد کر دیا ہے۔

پاکستان کی وزارت خزانہ نے جون 2025 کے ماہانہ اقتصادی جائزے میں دعویٰ کیا تھا کہ مالی سال 2024-25 کے دوران حقیقی جی ڈی پی میں 2.68 فیصد اضافہ ہوا۔

ورلڈ بینک نے مالی سال 2025-26 کے لیے پاکستان کی جی ڈی پی گروتھ 3.1 فیصد رہنے کا اندازہ لگایا ہے جبکہ ایشیائی ترقیاتی بینک (اے ڈی بی) نے اسی مدت کے لیے 3 فیصد کا تخمینہ جاری کیا ہے۔

اے ڈی بی نے اپنی تازہ رپورٹ میں مالی سال 2024-25 کے لیے پاکستان کی شرح نمو کا تخمینہ 2.5 فیصد سے بڑھا کر 2.7 فیصد کر دیا ہے۔

آئی ایم ایف نے کہا ہے کہ عالمی اقتصادی نمو 2025 میں 3 فیصد اور 2026 میں 3.1 فیصد رہنے کا امکان ہے۔ یہ اندازے اپریل 2025 کی رپورٹ کے مقابلے میں بالترتیب 0.2 اور 0.1 فیصد زیادہ ہیں۔

رپورٹ میں اس بہتری کی وجوہات میں توقع سے زیادہ پیشگی تجارتی سرگرمیوں میں اضافہ،امریکی ٹیرف ریٹس کا نسبتاً کم اثر، مالیاتی حالات میں بہتری، بالخصوص کمزور امریکی ڈالر کی بدولت اور کچھ بڑی معیشتوں میں مالیاتی توسیع شامل ہیں۔

رپورٹ کے مطابق عالمی سطح پر مہنگائی 2025 میں 4.2 فیصد اور 2026 میں 3.6 فیصد تک گرنے کا امکان ہے۔

تاہم یہ اوسط مختلف ممالک میں مہنگائی کی شدت کو چھپا لیتی ہے؛ امریکہ میں مہنگائی ہدف سے بلند رہنے کا خدشہ ہے، جب کہ دیگر بڑی معیشتوں میں زیادہ قابو میں رہے گی۔

آئی ایم ایف نے خبردار کیا ہے کہ مستقبل کی پیش گوئیوں کو لاحق خطرات کے سلسلے میں اب بھی خراب صورتحال کے امکانات زیادہ ہیں، جیسا کہ اپریل 2025 کی رپورٹ میں بھی ظاہر کیا گیا تھا۔