ٹیکس اصلاحات، وہی پرانی کہانی؟

بیوروکریسی کی عادت ہے کہ وہ ہمارے ٹیکس کے نظام کی ناکامیوں کو دور کرنے کے دعوے کے ساتھ اقدامات لاتی ہے اور اکثر غیر مثالی نتائج کا باعث بنتی ہے، جس سے ٹیکس دہندگان کو پیچیدہ قوانین کا سامنا کرنا پڑتا ہے، جبکہ محدود ٹیکس بیس اور بڑے پیمانے پر ٹیکس چوری کے بنیادی مسائل برقرار رہتے ہیں۔

اس پس منظر کو دیکھتے ہوئے، یہ بات سمجھ میں آتی ہے کہ ایف بی آر کے بڑے پیمانے پر تشہیر کیے جانے والے ”مقامی تبدیلی کے منصوبے“ کے مؤثر ہونے کے بارے میں تحفظات ہوں گے، جسے 20 ستمبر کو وزیر اعظم نے منظور کیا۔ اس میں ٹیکس ادارے کے منصوبوں کا تیسرے فریق کے ذریعے آڈٹ اور اُن ٹیکس دہندگان کے مالیاتی لین دین پر پابندیاں شامل ہیں جو بروقت اپنے واجب الادا ٹیکس ادا نہیں کرتے۔

منصوبے کا سادہ سا جائزہ لینے سے یہ معلوم ہوتا ہے کہ یہ شاید ٹیکس چوری کی اُس پھیلے ہوئے کلچر سے نمٹنے کی ایک اور ناکام کوشش ہو سکتی ہے، جس نے طویل عرصے سے محصولات کی پیداوار کو نقصان پہنچایا ہے۔ دیگر ایسے ہی اقدامات کی طرح جو ایف بی آر کی تاریخ میں ملتے ہیں، اس منصوبے کا زور بھی ان لوگوں پر ہے جو پہلے ہی ٹیکس نیٹ میں شامل ہیں۔

منصوبے میں پاکستانی ٹیکس دہندگان کو دو زمروں میں تقسیم کرنے کا تصور کیا گیا ہے: وہ جنہوں نے ایک مالی سال میں 10 ملین روپے سے کم سالانہ آمدنی ظاہر کی ہے اور وہ جن کی آمدنی اس حد سے زیادہ ہے۔ عجیب بات یہ ہے کہ حکومت ان لوگوں کو ممکنہ ٹیکس چور سمجھ رہی ہے جن کی آمدنی 10 ملین روپے سے کم ہے، اور جو لازماً اپنی جائیدادوں، گاڑیوں یا مالیاتی آلات کی خریداری کے دوران اپنی آمدنی کے ذرائع کی وضاحت کریں گے۔

اگرچہ یہ سچ ہے کہ کسی فرد کے اخراجات کا پروفائل ٹیکس چوری کا پتہ لگانے کے ممکنہ طریقوں میں سے ایک ہے، لیکن اس حقیقت سے کہ وہ لوگ جو 10 ملین روپے سے زیادہ آمدنی ظاہر کر رہے ہیں ان کے مالیاتی معاملات کی کم نگرانی ہوگی، مساوات اور جوابدہی کے حوالے سے خدشات پیدا ہوتے ہیں، کیونکہ زیادہ آمدنی والے افراد شاید ٹیکس کے سقم کا فائدہ اٹھا سکتے ہیں جبکہ بوجھ چھوٹے ٹیکس دہندگان پر غیر منصفانہ طور پر پڑ سکتا ہے۔

عملاً، اہم وسائل ان ٹیکس دہندگان کا پیچھا کرنے میں خرچ ہو سکتے ہیں جو پہلے سے ہی قوانین کی پابندی کر رہے ہیں، خاص طور پر چونکہ منصوبے کے تحت ٹیکس افسران کی کارکردگی کی بنیاد پر انہیں مراعات ملیں گی، اور توقع کی جا سکتی ہے کہ وہ ٹیکس نیٹ سے بچنے والوں کا پیچھا کرنے کے بجائے آسان راستہ اختیار کریں گے۔ یہ بالکل ایسے ہی ہے جیسے سائے کا پیچھا کرنا: جو پہلے سے زیادہ نچوڑے جا چکے ہیں ان سے کتنی آمدنی حاصل کی جا سکتی ہے؟

ٹیکس چوری کے ماحول میں شگاف ڈالنے کے معاملے میں یہ منصوبہ زیادہ تخلیقی نہیں ہے، جس کا بہترین ثبوت یہ ہے کہ ٹیکس بیوروکریسی اکثریت ریٹیلرز اور ہول سیلرز کو سیلز ٹیکس کے نظام میں شامل کرنے میں ناکام رہی ہے، جو ابھی تک ٹیکس نیٹ سے باہر ہیں۔

اس نئی اسکیم کے تحت تجویز کردہ اقدامات پر اس وقت تک سوالات اُٹھتے رہیں گے جب تک ہم مستقبل قریب میں رجسٹرڈ ریٹیلرز اور ہول سیلرز کی تعداد میں نمایاں اضافہ نہیں دیکھتے۔ یہاں واقعی ایک تبدیلی لانے والا اقدام غیر فائلرز کی کیٹیگری کو ختم کرنا ہو سکتا تھا۔

اس کیٹیگری کا ہونا، عملاً، قانون کی پاسداری کے بنیادی تصور کے خلاف ہے، کیونکہ اس نے ایسا ماحول پیدا کیا ہے جہاں کوئی بھی قانون کو بے خوف ہو کر نظر انداز کر سکتا ہے اور پھر صرف ایک مالیاتی جرمانہ ادا کر کے کسی سنگین نتائج سے بچ سکتا ہے۔

اس سال بجٹ تقریر کے دوران وزیر خزانہ اورنگزیب نے درست طور پر کہا تھا کہ ”9.5 فیصد ٹیکس ٹو جی ڈی پی تناسب سے ملک نہیں چل سکتا“۔

آخر کار، اس منصوبے کے معماروں کو خود سے یہ پوچھنا چاہیے: کیا ان کی اسکیم اس اہم مسئلے کو حل کرے گی اور کیا یہ ٹیکس بیس کو وسعت دینے جیسے بنیادی مسئلے کے حل کی طرف صحیح سمت میں گامزن ہے؟ یا پھر یہ بھی پچھلی سطحی تبدیلیوں کی طرح ناکام ہو جائے گی جو نہ تو ٹیکس چوری کو کم کر سکی اور نہ ہی ٹیکس دہندگان کی تعداد میں اضافہ کر سکی؟

کاپی رائٹ بزنس ریکارڈر, 2024