او جی ڈی سی ایل نے خیرپور میں گیس دریافت کرلی

آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے سندھ کے ضلع خیرپور میں اپنے بٹرسیم نارتھ ویسٹ-1 تحقیقی کنویں سے گیس اور کنڈینسیٹ دریافت کرلیا ہے۔ او جی ڈی سی ایل پاکستان کی سب سے بڑی تیل و گیس تلاش کرنے والی کمپنیوں میں سے ایک ہے۔

لسٹڈ کمپنی نے بدھ کو پاکستان اسٹاک ایکسچینج (پی ایس ایکس) کو بھیجے گئے نوٹس میں اس پیش رفت سے آگاہ کیا۔

نوٹس کے مطابق کنواں بٹرسیم ایکسپلوریشن لائسنس کے علاقے میں واقع ہے، جہاں او جی ڈی سی ایل آپریٹر کی حیثیت سے 95 فیصد ورکنگ انٹرسٹ رکھتی ہے، جبکہ گورنمنٹ ہولڈنگز (پرائیویٹ) لمیٹڈ (جی ایچ پی ایل) کا حصہ 5 فیصد ہے۔

او جی ڈی سی ایل نے بتایا کہ کنویں کی آزمائشی پیداوار کے دوران 32/64 انچ چوک کے ذریعے یومیہ 12.8 ملین مکعب فٹ گیس اور 175 بیرل کنڈینسیٹ حاصل ہوا۔ اس دوران کنویں کے دہانے پر بہاؤ کا دباؤ 3,020 پاؤنڈ فی مربع انچ (پی ایس آئی) ریکارڈ کیا گیا۔

کمپنی کے مطابق بٹرسیم نارتھ ویسٹ-1 پر 21 اگست 2026 کو کھدائی شروع کی گئی اور اسے سیمبر فارمیشن میں 3,732 میٹر کی گہرائی تک کھودا گیا۔ کنویں کے لاگز کی تشریح کی بنیاد پر لوئر گرو فارمیشن کی بیسل سینڈز میں ڈرل اسٹیم ٹیسٹ (ڈی ایس ٹی) کیا گیا۔

او جی ڈی سی ایل نے کہا کہ دریافت شدہ گیس کو جلد قومی گیس کلیکشن سسٹم سے منسلک کرنے اور اس سے فوری طور پر آمدنی حاصل کرنے کے لیے ضروری سرگرمیاں تیز کردی گئی ہیں۔

کمپنی کے مطابق یہ دریافت او جی ڈی سی ایل کے ہائیڈروکاربن ذخائر میں اضافہ کرے گی اور مقامی وسائل کے ذریعے توانائی کی بڑھتی ہوئی طلب اور رسد کے درمیان فرق کم کرنے میں مدد دے کر پاکستان کی توانائی سلامتی میں کردار ادا کرے گی۔

او جی ڈی سی ایل پاکستان کی سب سے بڑی تیل و گیس تلاش اور پیداوار کرنے والی کمپنی ہے، جس کی سرگرمیوں میں تلاش، ڈرلنگ آپریشنز، پیداوار، ذخائر کا انتظام اور انجینئرنگ معاونت شامل ہیں۔

کمپنی کے پاس پاکستان میں سب سے وسیع ایکسپلوریشن ایریا ہے، جو ملک میں دیے گئے مجموعی ایکسپلوریشن رقبے کے 40 فیصد سے زائد پر مشتمل ہے۔ کمپنی کے پاس تیل اور گیس کے نمایاں خالص ہائیڈروکاربن وسائل بھی موجود ہیں۔

حکومت پاکستان او جی ڈی سی ایل کی 67 فیصد سے زائد حصص کی مالک ہے، جبکہ او جی ڈی سی ایل ایمپلائی ایمپاورمنٹ ٹرسٹ اور نجکاری کمیشن پاکستان بھی اس کے بڑے حصص داروں میں شامل ہیں۔