پی ایس ڈی پی، چار ماہ میں 412 ارب روپے کے ترقیاتی فنڈز جاری کرنے کی منظوری

وفاقی حکومت نے مالی سال 2026-27 کے پہلے چار ماہ (جولائی تا اکتوبر) کے دوران پبلک سیکٹر ڈیولپمنٹ پروگرام (پی ایس ڈی پی) کے تحت 412 ارب 29 کروڑ 40 لاکھ روپے کے ترقیاتی فنڈز جاری کرنے کی منظوری دی، جبکہ رواں مالی سال کے لیے مجموعی طور پر ایک ہزار ارب روپے مختص کیے گئے ہیں۔

وزارت منصوبہ بندی، ترقی و خصوصی اقدامات کے منگل کو جاری کردہ تازہ اعداد و شمار کے مطابق جولائی سے اکتوبر 2026 کے دوران ترقیاتی اخراجات 103 ارب 87 کروڑ 60 لاکھ روپے رہے۔

پی ایس ڈی پی 2026-27 کے تحت وفاقی وزارتوں کے لیے 682 ارب 48 کروڑ 50 لاکھ روپے، سرکاری کارپوریشنز کے لیے 312 ارب 51 کروڑ 50 لاکھ روپے، منصوبوں کی واجبات کے لیے 4 ارب روپے اور سی پیک 2.0 کے تحت نئے اقدامات کے لیے ایک ارب روپے مختص کیے گئے ہیں۔

وفاقی وزارتوں اور ڈویژنز میں وزارت آبی وسائل کو سب سے زیادہ 90 ارب 80 کروڑ 40 لاکھ روپے کے فنڈز جاری کرنے کی منظوری دی گئی، جبکہ اس کے لیے مجموعی طور پر 103 ارب 8 کروڑ 60 لاکھ روپے مختص ہیں۔ اس مد میں اخراجات 18 ارب 72 کروڑ 60 لاکھ روپے رہے۔

صوبوں اور خصوصی علاقوں کے لیے مختص 233 ارب 38 کروڑ 60 لاکھ روپے میں سے 59 ارب 79 کروڑ 60 لاکھ روپے جاری کرنے کی منظوری دی گئی، جبکہ اخراجات 23 ارب 80 کروڑ 80 لاکھ روپے رہے۔

ہائر ایجوکیشن کمیشن کے لیے 46 ارب روپے مختص کیے گئے، جن میں سے 13 ارب 80 کروڑ روپے جاری کرنے کی منظوری دی گئی اور 4 ارب 71 کروڑ 50 لاکھ روپے خرچ ہوئے۔

سرکاری کارپوریشنز میں نیشنل ہائی وے اتھارٹی کے لیے 224 ارب 51 کروڑ 50 لاکھ روپے مختص کیے گئے، جن میں سے 78 ارب 58 کروڑ روپے جاری کرنے کی منظوری دی گئی۔ دوسری جانب این ٹی ڈی سی اور پیپکو کے لیے 88 ارب روپے مختص کیے گئے، جن میں سے 30 ارب 80 کروڑ روپے کی منظوری دی گئی۔