ریاض ایئرپورٹ پر حملوں کے بعد متعدد بین الاقوامی ایئرلائنز کی پروازیں منسوخ

ریاض ایئرپورٹ پر یمن کے حوثیوں کے ہفتے کے آخر میں ہونے والے مہلک حملوں کے بعد متعدد بین الاقوامی ایئرلائنز نے سعودی عرب اور پڑوسی ممالک کے لیے پروازیں منسوخ یا معطل کردی ہیں۔ خطے میں امریکا اور اسرائیل کی ایران کے خلاف جنگ شروع ہونے کے بعد فضائی سفر پہلے ہی متاثر ہے۔

پیر کو جاری کیے گئے نوٹس کے مطابق ریاض ایئرپورٹ 17 اکتوبر تک بند رہے گا۔

ایئر فرانس کے ایل ایم گروپ نے سعودی دارالحکومت کے لیے پروازوں کی معطلی اکتوبر کے اختتام تک بڑھا دی ہے، جبکہ ایئر انڈیا نے 15 اکتوبر تک ریاض آنے اور جانے والی پروازیں معطل رکھنے کا اعلان کیا ہے۔ اکاسا ایئر نے جدہ اور ریاض کے لیے 13 اکتوبر تک پروازیں روک دی ہیں۔

کیتھے پیسیفک نے ہانگ کانگ سے دبئی اور ریاض کے لیے پروازوں کی بحالی 31 جنوری 2027 تک مؤخر کردی ہے، جبکہ امریکی ایئرلائن ڈیلٹا نے اٹلانٹا سے ریاض کے لیے مجوزہ پروازیں مارچ 2027 تک ملتوی کردی ہیں۔

اتحاد ایئرویز نے ابوظبی سے ریاض کی تمام پروازیں اور دمام و جدہ کے لیے 10 پروازیں 19 اکتوبر تک منسوخ کردی ہیں۔ بحرین کی گلف ایئر نے 12 سے 17 اکتوبر تک ریاض کی پروازیں معطل کردی ہیں۔

بھارت کی انڈیگو نے ریاض اور دمام کے لیے پروازوں کی منسوخی 15 اکتوبر تک بڑھا دی، جبکہ لفتھانزا گروپ نے 16 اکتوبر تک ریاض کی تمام پروازیں منسوخ کردی ہیں۔ فلپائن ایئرلائنز نے ریاض کے لیے پروازوں کی معطلی 29 نومبر تک بڑھا دی، جبکہ قطر ایئرویز نے ریاض اور دمام کے لیے پروازیں عارضی طور پر روک دی ہیں۔