بلغاریہ کے ساحل کے قریب ڈرون حملے میں جہاز ڈوب گیا، 11 ملاح لاپتا

بلغاریہ کے ساحل کے قریب ڈرون حملے میں ایک مال بردار جہاز ڈوبنے کے بعد 11 ملاح لاپتا ہوگئے، جبکہ پانچ کو بچا لیا گیا۔ ایک ہفتے کے دوران بحیرہ اسود کے اس علاقے میں مال بردار جہاز ڈوبنے کا یہ دوسرا ہلاکت خیز واقعہ ہے۔ بلغاریہ نے واقعے کے بعد روسی سفیر کو طلب کرلیا۔

بلغاریہ کے حکام کے مطابق رات کے دوران دو مال بردار جہازوں کو ڈرون حملوں میں نشانہ بنایا گیا، جن میں سے ایک ڈوب گیا۔ حکام نے روس پر براہ راست الزام عائد نہیں کیا، تاہم وزیر اعظم رومین رادیف نے کہا کہ ان حملوں کے نتائج روسی فیڈریشن کے مفاد میں ہیں۔ ماسکو کی جانب سے فوری طور پر کوئی ردعمل سامنے نہیں آیا۔

حکام کے مطابق ڈوبنے والا جہاز گاؤں کراپیٹس کے ساحل کے قریب حادثے کا شکار ہوا۔ بلغاریہ کے ذرائع ابلاغ نے اس کی شناخت مال بردار جہاز آزوف کونکورڈ کے طور پر کی ہے۔

دوسرے جہاز، مالٹا کے پرچم تلے سفر کرنے والے چیلسی 3 کو تین ڈرونز سے نشانہ بنایا گیا۔ اس کے عملے کے تمام 15 ارکان، جن میں سات یوکرینی اور آٹھ آذربائیجانی شہری شامل تھے، محفوظ رہے۔

یورپی کمیشن کی صدر ارسولا وان ڈیر لیین اور یوکرین نے حملوں کی مذمت کی۔ یوکرین کے وزیر خارجہ آندری سبیگا نے کہا کہ روس شہریوں کی زندگیوں کو دانستہ نظرانداز کر رہا ہے۔

گزشتہ ہفتے بھی بلغاریہ کے خصوصی اقتصادی سمندری علاقے میں ایک جہاز ڈرون حملے کے بعد ڈوب گیا تھا، جس میں 10 ملاح لاپتا ہوگئے تھے۔ روس اور یوکرین دونوں بڑے اناج برآمد کنندگان ہیں اور جنگ کے باعث بحیرہ اسود میں تجارتی جہاز رانی مسلسل متاثر ہو رہی ہے۔