ڈالر کے مقابلے میں روپے کی پیش قدمی جاری

انٹربینک مارکیٹ میں جمعہ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.25 روپے پر بند ہوا۔

یاد رہے کہ جمعرات کو مقامی کرنسی 277.26 روپے پر بند ہوئی تھی۔

عالمی سطح پر جمعہ کو ایشیائی کاروباری سرگرمیوں کے آغاز پر جاپانی ین امریکی ڈالر اور یورو کے مقابلے میں کمزور رہا جبکہ شرح سود میں اضافے کی توقع کے پیش نظر بینک آف جاپان کے فیصلے سے قبل کرنسی مارکیٹ میں محتاط رجحان برقرار رہا۔

ین کی قدر 0.1 فیصد کم ہوکر 156.19 ین فی ڈالر ہوگئی، جمعرات کو تین روزہ گراوٹ کا سلسلہ ٹوٹنے کے بعد ین نے ایک بار پھر قدر کھونا شروع کردی ہے جبکہ ٹریڈرز اس توقع کے پیش نظر تیاری کر رہے ہیں کہ جاپانی مرکزی بینک شرح سود میں اضافہ کرکے اسے تین دہائیوں سے زائد عرصے کی بلند ترین سطح پر لے جائے گا۔

برطانوی پاؤنڈ 1.3359 ڈالر پر ڈھائی ماہ کی کم ترین سطح کے قریب مستحکم رہا، جب بینک آف انگلینڈ نے جمعرات کو شرح سود برقرار رکھی اور غیر متوقع طور پر سرکاری بانڈز کی فروخت چھ ماہ کے لیے روک دی۔

یورو بھی 1.1478 ڈالر پر بغیر کسی تبدیلی کے رہا۔

امریکی ڈالر انڈیکس 100.2100 پر مستحکم رہا، جبکہ جمعرات کو ڈھائی ماہ کی بلند ترین سطح پر پہنچنے کے بعد اس میں معمولی کمی ہوئی تھی۔