غزہ : اسرائیلی حملے میں 2 افراد شہید

اسرائیلی فضائی حملے میں اتوار کو غزہ کی پٹی میں ایک گاڑی میں سوار کم از کم دو فلسطینی شہید جبکہ 13 دیگر زخمی ہوگئے۔

طبی عملے کے مطابق مغربی غزہ سٹی کے تل الہوا محلے میں ہونے والے حملے سے گاڑی بری طرح تباہ ہوگئی، سوشل میڈیا پر گردش کرنے والی ویڈیو میں یہ منظر دیکھا جاسکتا ہے۔

مقامی طبی عملے نے رائٹرز کو بتایا کہ انہوں نے لوگوں سے اپیل کی ہے کہ جاں بحق ہونے والے دونوں افراد کی شناخت میں مدد دینے والی معلومات فراہم کریں۔ دھماکے کے باعث دونوں افراد کی لاشیں ٹکڑے ٹکڑے ہوگئیں۔

اسرائیلی فوج نے کہا کہ حملے میں حماس کے دو ارکان کو نشانہ بنایا گیا، تاہم مزید تفصیلات فراہم نہیں کی گئیں۔

امریکا کی حمایت سے اکتوبر 2025 میں ہونے والی جنگ بندی نے غزہ میں بڑے پیمانے پر جاری لڑائی روک دی تھی، تاہم اسرائیلی حملے ختم نہیں ہوئے اور مستقل امن کی جانب پیش رفت بھی بہت محدود رہی ہے۔

حماس نے اسرائیل پر جنگ بندی کی خلاف ورزی اور غزہ تنازع ختم کرنے کے لیے امریکی صدر ڈونلڈ ٹرمپ کے وسیع تر منصوبے پر عمل درآمد کی کوششوں کو نقصان پہنچانے کا الزام عائد کیا ہے۔ منصوبے میں غزہ کی پٹی سے اسرائیلی فوج کا انخلا اور حماس کو غیر مسلح کرنا شامل ہے۔

اسرائیل کا کہنا ہے کہ حماس معاہدے کی خلاف ورزی کر رہی ہے۔غزہ کے محکمہ صحت کے حکام کے مطابق جنگ بندی نافذ ہونے کے بعد سے غزہ میں 1,300 سے زائد فلسطینی، جن میں زیادہ تر عام شہری ہیں، شہید ہوچکے ہیں، جبکہ اسرائیلی فوج کا کہنا ہے کہ اس دوران اس کے چار فوجی ہلاک ہوئے ہیں۔

حماس عام طور پر اپنے جنگجوؤں کی اموات سے متعلق معلومات جاری نہیں کرتی ۔