عمران سرور نیشنل بینک آف پاکستان کے صدر و سی ای او مقرر

حکومت نے عمران سرور کو فوری طور پر تین سالہ مدت کے لیے نیشنل بینک آف پاکستان (این بی پی) کا صدر اور چیف ایگزیکٹو آفیسر (سی ای او) مقرر کر دیا ہے۔

این بی پی نے جمعرات کو پاکستان اسٹاک ایکسچینج (پی ایس ایکس) کو بھیجی گئی ایک فائلنگ (دستاویز) میں اس پیشرفت کا انکشاف کیا۔

نوٹس میں کہا گیا کہ ہمیں مطلع کرنا ہے کہ حکومتِ پاکستان، وزارتِ خزانہ نے 3 ستمبر 2026 کے نوٹیفکیشن نمبر F.No.1(9) Bkg-III/2022-696 کے ذریعے عمران سرور کو فوری طور پر تین سال کی مدت کے لیے صدر/چیف ایگزیکٹو آفیسر مقرر کیا ہے تاہم یہ تقرری اسٹیٹ بینک آف پاکستان کی جانب سے فٹ اینڈ پراپر ٹیسٹ کلیئر ہونے سے مشروط ہے۔

این بی پی ملک کے سب سے بڑے کمرشل بینکوں میں سے ایک ہے۔ گزشتہ چند برسوں کے دوران اس کی قیادت میں خصوصاً صدر/چیف ایگزیکٹو آفیسر اور بورڈ آف ڈائریکٹرز کے حوالے سے متعدد تبدیلیاں دیکھنے میں آئی ہیں۔

رحمت علی حسنی کو اس سے قبل 12 مئی 2022 کو این بی پی کا صدر/چیف ایگزیکٹو آفیسر مقرر کیا گیا تھا تاہم وہ 21 اگست 2026 کو اپنی مدتِ ملازمت مکمل ہونے تک اس عہدے پر فائز رہے۔

چند روز قبل بینک کے سابق سربراہ کی مدتِ ملازمت مکمل ہونے کے بعد عبدالواحد سیٹھی نے این بی پی کے قائم مقام صدر اور چیف ایگزیکٹو آفیسر کا عہدہ سنبھال لیا تھا۔

این بی پی نے کیلنڈر سال 2026 کی پہلی ششماہی میں مضبوط کارکردگی کا مظاہرہ کرتے ہوئے 67.3 ارب روپے قبل از ٹیکس منافع اور 32.4 ارب روپے بعد از ٹیکس منافع حاصل کیا، جبکہ 30 جون 2026 کو ختم ہونے والی ششماہی کے دوران فی حصص آمدنی 15.23 روپے رہی۔