آبنائے ہرمز سے کموڈٹی جہازوں کی آمدورفت بدستور محدود

پیر کے روز آبنائے ہرمز سے گزرنے والے بحری جہازوں کی تعداد ہفتے کے اختتام کے مقابلے میں معمولی تبدیل ہوئی اور تقریباً 5 رہی۔ منگل کو جاری ہونے والے ابتدائی بحری جہازوں کی نگرانی کے اعداد و شمار کے مطابق یہ تعداد گزشتہ 10 دن کی اوسط تقریباً 14 جہازوں سے نمایاں طور پر کم ہے۔

کپلرکے اعداد و شمار کے مطابق 4 بحری جہاز آبنائے ہرمز میں داخل ہوئے جبکہ ایک جہاز وہاں سے باہر نکلا۔

وہ بحری جہاز جو اپنے ٹرانسپونڈر بند کرکے آبنائے ہرمز سے گزرتے ہیں، انہیں اس تعداد میں شامل نہیں کیا جاتا۔

اعداد و شمار کے مطابق پیر کو آبنائے ہرمز سے گزرنے والے جہازوں میں کوئی مائع کارگو ٹینکر شامل نہیں تھا۔

آبنائے میں داخل ہونے والے جہازوں میں ایک خالی ہینڈی سائز گیس ٹینکر تھا، جو ایرانی روٹ کے ذریعے آبنائے تک پہنچا۔ دیگر 3 بحری جہاز خشک بلک کارگو سے لدے ہوئے تھے۔

ایرانی میڈیا رپورٹس کے مطابق منگل کو ایک سعودی آئل ٹینکر کو آبنائے ہرمز کے جنوبی راستے سے گزرتے ہوئے روک لیا گیا۔

دوسری جانب ایک اور اہم بحری گزرگاہ آبنائے باب المندب میں بحری جہازوں کی آمدورفت 3 روز کی بلند ترین سطح پر پہنچ گئی۔ کپلر کے اعداد و شمار کے مطابق پیر کو مجموعی طور پر 27 بحری جہاز آبنائے باب المندب سے گزرے، جن میں 14 اندر داخل ہوئے جبکہ 13 باہر نکل گئے۔

اعداد و شمار کے مطابق ان 27 بحری جہازوں میں 5 خام تیل لے جانے والے ٹینکرز تھے، جن میں ایفرامکس یا سویز میکس سائز کے ٹینکر شامل تھے۔

آبنائے باب المندب میں داخل ہونے یا وہاں سے نکلنے والے جہازوں میں کوئی بہت بڑے خام تیل بردار جہاز یا مائع قدرتی گیس (ایل این جی) ٹینکر شامل نہیں تھا۔