بنگلہ دیش کی چینی جے 10 سی ای لڑاکا طیارے خریدنے کے لیے بات چیت جاری

بنگلہ دیش چین سے جے 10 سی ای لڑاکا طیارے اور حملہ آور ہیلی کاپٹرز خریدنے کے لیے باضابطہ مذاکرات کے قریب پہنچ گیا ہے، جبکہ حکومت کا ایک پینل معاہدے کے مسودے کی تیاری کر رہا ہے، وزیراعظم کے اطلاعات و نشریات کے مشیر زاہد الرحمان نے منگل کو بتایا۔

مجوزہ خریداری گزشتہ کئی برسوں میں بنگلہ دیش کے سب سے بڑے دفاعی سودوں میں شامل ہوگی اور بیجنگ کے ساتھ فوجی تعلقات کو مزید مضبوط کرے گی۔ چین پہلے ہی ڈھاکا کو سب سے زیادہ اسلحہ فراہم کرنے والا ملک ہے۔ جے 10 سی ای نے مئی 2025 میں پاکستان اور بھارت کے درمیان جھڑپوں کے دوران اس طیارے کے بھارتی لڑاکا طیارے مار گرانے میں استعمال ہونے کے پاکستانی دعوے کے بعد عالمی توجہ حاصل کی، تاہم یہ دعویٰ متنازع ہے۔

زاہد الرحمان نے کہا کہ ڈھاکا نے اپنے خطے میں ہونے والے تنازع کے دوران چینی طیارے کی مبینہ مؤثر کارکردگی کا نوٹس لیا ہے۔مقامی میڈیا کے مطابق بنگلہ دیش اپنی فضائیہ کو جدید بنانے کے لیے 24 تک جے 10 سی ای طیارے خریدنے پر غور کر رہا ہے۔پاکستان اس طیارے کے برآمدی ماڈل کا واحد تصدیق شدہ غیر ملکی آپریٹر ہے۔

زاہد الرحمان نے بتایا کہ ڈھاکا کتنے طیارے خریدنے کا ارادہ رکھتا ہے، معاہدے کی مالیت کتنی ہوگی اور طیاروں کی فراہمی کب تک ہوگی، اس بارے میں تفصیلات مذاکرات کے دوران طے کی جائیں گی۔ چین گزشتہ دو دہائیوں کے دوران بنگلہ دیش کو بحری جہاز، جنگی طیارے، ٹینک اور میزائل نظام فراہم کرتا رہا ہے، جس کے باعث وہ ملک کے لیے فوجی سازوسامان کا سب سے بڑا ذریعہ بن چکا ہے۔