ناروے کا 2027 میں یوکرین کیلئے 9.2 ارب ڈالر امداد کا اعلان

ناروے نے 2027 کے مالی سال میں یوکرین کے لیے مزید 85 ارب نارویجن کرون، یعنی تقریباً 9.2 ارب ڈالر کی مالی امداد دینے کا اعلان کیا ہے، جو 2026 میں فراہم کی گئی رقم کے برابر ہے۔

ناروے کی حکومت نے اتوار کو جاری بیان میں کہا کہ وزیراعظم جوناس گار ستورے اور شمالی یورپ کے دیگر ممالک کے رہنما روس کے خلاف جنگ میں یوکرین سے اظہارِ یکجہتی کے لیے اتوار کو کیف کا دورہ کررہے ہیں۔

حکومت کی جانب سے اوسلو میں جاری کردہ تقریر کے متن کے مطابق ناروے کی امداد فوجی اور انسانی دونوں شعبوں کے اخراجات کے لیے استعمال ہوگی۔

وزیراعظم جوناس گار ستورے نے کہا کہ یوکرین کی حمایت اور اس کی تعمیرِ نو محض امداد نہیں بلکہ یورپ کی اپنی سلامتی میں سرمایہ کاری ہے۔

دوسری جانب روسی صدر ولادیمیر پیوٹن نے ہفتے کو اپنے بیان میں کہا تھا کہ یوکرین نے روس کے اقتصادی اہداف کو نشانہ بنا کر پنڈورا باکس کھول دیا ہے اور ماسکو یوکرین کے انتہائی حساس اقتصادی شعبوں کو نشانہ بنا کر جوابی کارروائی کرے گا۔

روس اور یوکرین دونوں ایک دوسرے کے اقتصادی انفرااسٹرکچر کو نقصان پہنچانے کے لیے ڈرون حملوں میں اضافہ کررہے ہیں۔ دونوں ممالک کی جانب سے اکثر ایسے اہداف کو بھی نشانہ بنایا جارہا ہے جو جنگ کے محاذ سے بہت دور واقع ہیں، جبکہ روس کی جانب سے شروع کی گئی جنگ کو ساڑھے چار سال مکمل ہونے کے قریب ہیں۔