بھارت نے جنرل ایٹومکس کے ساتھ 20 کروڑ 30 لاکھ ڈالر کا ڈرون لیز معاہدہ کرلیا

بھارت نے اعلان کیا ہے کہ اس نے جنرل ایٹومکس ایرو ناٹیکل سسٹمز کے ساتھ بھارتی بحریہ کے لیے دو ایم کیو-9 بی سی گارڈین طویل دورانیے تک بلند بلندی پر پرواز کرنے والے ڈرونز 30 ماہ کے لیے لیز پر لینے کا معاہدہ کرلیا ہے۔

معاہدے کی مالیت 19.43 ارب بھارتی روپے (20 کروڑ 30 لاکھ ڈالر) ہے۔بھارتی حکومت کے مطابق یہ معاہدہ بھارتی بحریہ کی سمندری حدود کی نگرانی اور صورتحال سے باخبر رہنے کی صلاحیت میں نمایاں اضافہ کرے گا جبکہ بحرِ ہند کے خطے میں ہونے والی پیش رفت کی نگرانی اور اس پر ردعمل دینے کی صلاحیت بھی مضبوط ہوگی۔

یہ معاہدہ ایسے وقت میں ہوا ہے جب بھارت اور چین بحرِ ہند کے خطے میں اثر و رسوخ بڑھانے کے لیے اسٹریٹجک کشمکش میں مصروف ہیں۔

2020 میں بھارتی بحریہ نے جنرل ایٹومکس سے دو ایم کیو-9 اے سی گارڈین ڈرونز ایک سال کے لیے لیز پر لیے تھے، جس کی مدت بعد ازاں بڑھا دی گئی تھی۔

بھارت طویل عرصے سے امریکا سے بڑے اور مسلح ڈرونز خریدنے میں دلچسپی ظاہر کرتا رہا ہے۔ 2024 میں نئی دہلی نے امریکی محکمہ خارجہ کے ساتھ 31 مسلح ایم کیو 9 بی اسکائی گارڈین اور سی گارڈین ڈرونز خریدنے کا معاہدہ کیا تھا۔