ٹرمپ کا آبنائے ہرمز کو جلد امریکی علاقہ قرار دینے کا اعلان
- ہم نے ناکہ بندی کر رکھی ہے، کوئی جہاز وہاں سے گزر نہیں سکتا جب تک ہم خود نہ چاہیں، امریکی صدر
صدر ڈونلڈ ٹرمپ نے جمعہ کو کہا ہے کہ ایران کو شکست دینے کے بعد وہ جلد آبنائے ہرمز کو امریکی علاقے کا حصہ قرار دیں گے۔
انہوں نے نیویارک ریاست میں ایک پولیس اکیڈمی میں سیاسی ریلی کے دوران ہنستے ہوئے کہا کہ ایران کو شکست دینے کے بعد جسے بری طرح شکست دی جارہی ہے میں بہت جلد آبنائے ہرمز کو امریکا کا علاقہ قرار دینے کا اعلان کروں گا۔
انہوں نے مزید کہا کہ یہ بات درست ہے۔
ٹرمپ نے اسرائیل کے ساتھ ملکر 28 فروری کو ایران کے خلاف جنگ شروع کی جس کے اعلان کردہ مقاصد میں ایران کے متنازع جوہری پروگرام کا خاتمہ اور عوامی بغاوت کو ہوا دینا شامل تھا۔
تاہم ایران نے جوابی کارروائی کرتے ہوئے آبنائے ہرمز کے ایک بڑے حصے پر عملاً کنٹرول قائم کرلیا جو عالمی سطح پر توانائی اور دیگر اجناس کی بھاری مقدار کی ترسیل کے لیے ایک انتہائی اہم بحری راستہ ہے۔
آبنائے ہرمز کے معاملے پر امریکا اور ایران کے درمیان تعطل بدستور برقرار ہے۔ ایران نے بیشتر سویلین بحری جہازوں کو گزرنے سے روک رکھا ہے جبکہ امریکی بحریہ نے ایرانی بندرگاہوں کی ناکہ بندی کر رکھی ہے تاکہ ایران کی معیشت کو مفلوج کیا جا سکے۔
ٹرمپ نے حامیوں اور پولیس اہلکاروں کے پرجوش ہجوم سے خطاب کرتے ہوئے کہا کہ ہم نے ناکہ بندی کر رکھی ہے۔ کوئی جہاز وہاں سے گزر نہیں سکتا جب تک ہم خود نہ چاہیں۔
Comments