انڈونیشیا میں 7.7 شدت کا خوفناک زلزلہ، 20 افراد جاں بحق

انڈونیشیا کے ساحل کے قریب ہفتے کو 7.7 شدت کا خوفناک زلزلہ آ گیا، آفٹر شاکس کا سلسلہ جاری ہے، 20 افراد جاں بحق ہوگئے۔

صبح سویرے آنے والے زلزلے کے بعد جنوب مشرقی ایشیائی ملک کے کئی علاقوں میں ایک میٹر (تین فٹ) سے کم بلند سونامی لہریں ریکارڈ کی گئیں۔ زلزلے کے تقریباً تین گھنٹے بعد سونامی کی وارننگ واپس لے لی گئی۔

شہر کے ریسکیو ادارے کے سربراہ فتح الرحمٰن نے بتایا کہ بندرگاہی شہر ماؤمِرے کے اطراف امدادی کارکنوں نے 20 افراد کی لاشیں نکالیں جب کہ 6 زخمی افراد زخمی ہوئے ، 2 افراد ملبے تلے دبے ہوئے ہیں۔

فتح الرحمٰن نے رائٹرز کو بتایا کہ زلزلے کے مرکز کے قریب ترین علاقے ناگے کیو تک امدادی ٹیمیں تاحال نہیں پہنچ سکی ہیں جبکہ وہاں مواصلاتی رابطے بھی متاثر ہوئے ہیں۔ انہوں نے بتایا کہ کار کے ذریعے ناگے کیو پہنچنے کی کوششیں لینڈ سلائیڈنگ کے باعث ناکام ہوگئیں جبکہ ایک اور ٹیم فیری کے ذریعے وہاں پہنچنے کی کوشش کررہی ہے۔

قومی ڈیزاسٹر مینجمنٹ ایجنسی کے مطابق ناگے کیو میں تقریباً 2,000 رہائشیوں کو محفوظ مقامات پر منتقل کردیا گیا جبکہ متعدد مکانات، گوداموں اور سرکاری تنصیبات کو نقصان پہنچنے کی اطلاعات ہیں۔ حکام نے بعض علاقوں میں ٹریفک کی شدید روانی میں خلل اور بجلی کی بندش کی بھی اطلاع دی ہے۔

مشرقی نوسا تنگارا صوبے کے گورنر ایمانوئل میلکیادس لاکا لینا نے ایک پریس کانفرنس میں بتایا کہ کم از کم پانچ افراد سوتے ہوئے عمارتوں کا ملبہ گرنے سے ہلاک ہوئے۔