ٹرمپ کی جانب سے ایران پر حملہ مؤخر کرنے پر سونے کی قیمتیں بڑھ گئیں

عالمی منڈی میں پیر کو سونے کی قیمتوں میں اضافہ ریکارڈ کیا گیا، جبکہ امریکی صدر ڈونلڈ ٹرمپ کی جانب سے ایران پر نئی فوجی کارروائی مؤخر کیے جانے کے بعد خام تیل کی قیمتوں میں نمایاں کمی دیکھی گئی۔ اس پیش رفت سے مہنگائی اور شرح سود میں اضافے سے متعلق خدشات میں وقتی کمی آئی۔

اسپاٹ گولڈ 0.7 فیصد اضافے کے ساتھ 4,067.06 ڈالر فی اونس تک پہنچ گیا، جبکہ امریکی گولڈ فیوچر 0.9 فیصد بڑھ کر 4,065.60 ڈالر فی اونس پر ٹریڈ ہوئے۔

صدر ٹرمپ نے ہفتے کی شب اپنے سوشل میڈیا پلیٹ فارم ٹروتھ سوشل پر کہا کہ ایران اور مشرق وسطیٰ کے دیگر ممالک نے معاہدے کو حتمی شکل دینے کے لیے مزید وقت مانگا ہے، جس کے نتیجے میں آبنائے ہرمز فوری، مکمل اور مستقل طور پر دوبارہ کھول دی جائے گی اور ایران کے جوہری خطرے کا خاتمہ ممکن ہوگا۔

اس اعلان کے بعد پیر کو مارکیٹ کھلتے ہی خام تیل کی قیمتیں 5 ڈالر فی بیرل سے زائد گر گئیں۔

امریکا اور ایران کے درمیان جاری کشیدگی کے آغاز سے ہی سونے کی قیمتیں دباؤ کا شکار تھیں، کیونکہ جنگ کے باعث بڑھتی مہنگائی مرکزی بینکوں کو شرح سود میں اضافے پر مجبور کر سکتی ہے۔ اگرچہ سونا روایتی طور پر مہنگائی سے بچاؤ کا ذریعہ سمجھا جاتا ہے، تاہم بلند شرح سود کے ماحول میں اس کی کشش کم ہو جاتی ہے کیونکہ اس پر کوئی منافع حاصل نہیں ہوتا۔

دوسری جانب امریکی فیڈرل ریزرو کے تین عہدیداروں نے گزشتہ ہفتے شرح سود میں اضافے کی حمایت کرتے ہوئے خبردار کیا کہ اگر فوری طور پر قلیل مدتی شرح سود نہ بڑھائی گئی تو مہنگائی فیڈ کے 2 فیصد ہدف سے اوپر برقرار رہ سکتی ہے۔

سرمایہ کاروں کی نظریں اس ہفتے جاری ہونے والی امریکی لیبر مارکیٹ کی اہم رپورٹس پر بھی مرکوز ہیں، جن میں جاب اوپننگز، اے ڈی پی روزگار رپورٹ، ہفتہ وار بے روزگاری کے دعوے اور نان فارم پے رولز رپورٹ شامل ہیں۔

دیگر قیمتی دھاتوں میں اسپاٹ چاندی 0.7 فیصد بڑھ کر 58.02 ڈالر فی اونس، پلاٹینم 0.7 فیصد اضافے سے 1,653.78 ڈالر جبکہ پیلاڈیم 1.5 فیصد بڑھ کر 1,293 ڈالر فی اونس ہو گیا۔