اوگرا نے اگست 2026 کے لیے ایل پی جی کی قیمت میں 13 روپے فی کلو اضافہ کر دیا

آئل اینڈ گیس ریگولیٹری اتھارٹی (اوگرا) نے جمعہ کو اگست 2026 کے لیے مائع پیٹرولیم گیس (ایل پی جی) کی قیمت میں 12 روپے 89 پیسے فی کلوگرام اضافہ کر دیا، جس کے بعد 11.8 کلوگرام کے گھریلو سلنڈر کی قیمت میں 152 روپے ایک پیسہ اضافہ ہو گیا۔ نئی قیمتوں کا اطلاق یکم اگست سے ہوگا۔

اوگرا کے جاری کردہ نوٹیفکیشن کے مطابق اگست کے لیے ایل پی جی کی صارف قیمت 2 لاکھ 54 ہزار 315 روپے 35 پیسے فی ٹن مقرر کی گئی ہے، جبکہ 11.8 کلوگرام کے گھریلو سلنڈر کی قیمت 3,000 روپے 92 پیسے ہوگی۔

اس کے مقابلے میں جولائی میں ایل پی جی کی قیمت 2 لاکھ 41 ہزار 432 روپے 84 پیسے فی ٹن اور 11.8 کلوگرام کے گھریلو سلنڈر کی قیمت 2,848 روپے 91 پیسے تھی۔

اسی طرح ایل پی جی کی پیداواری قیمت جولائی کے 2 لاکھ 132 روپے 84 پیسے فی ٹن کے مقابلے میں بڑھا کر 2 لاکھ 13 ہزار 15 روپے 35 پیسے فی ٹن مقرر کر دی گئی۔

11.8 کلوگرام کے گھریلو سلنڈر کی پیداواری قیمت بھی 2,361 روپے 57 پیسے سے بڑھ کر 2,513 روپے 58 پیسے ہو گئی، یعنی اس میں 152 روپے ایک پیسے کا اضافہ کیا گیا ہے۔

نظرثانی شدہ قیمتوں کا اطلاق یکم اگست 2026 سے ہوگا اور یہ پورے مہینے تک نافذ العمل رہیں گی۔

جولائی 2026 کے لیے آر ایل این جی کی قیمتوں میں 36 فیصد تک اضافہ

دوسری جانب اوگرا نے جولائی 2026 کے لیے ری گیسیفائیڈ مائع قدرتی گیس (آر ایل این جی) کی قیمتوں میں نمایاں اضافے کا بھی نوٹیفکیشن جاری کر دیا ہے، جس کے تحت سوئی ناردرن گیس پائپ لائنز لمیٹڈ (ایس این جی پی ایل) اور سوئی سدرن گیس کمپنی لمیٹڈ (ایس ایس جی سی ایل)، دونوں کے لیے ترسیل اور تقسیم کے نرخ بڑھا دیے گئے ہیں۔

اوگرا کے نوٹیفکیشن کے مطابق ایس این جی پی ایل کے لیے آر ایل این جی کی ترسیلی قیمت جون کے 17.9394 ڈالر فی ایم ایم بی ٹی یو کے مقابلے میں 32.12 فیصد اضافے کے بعد 23.7020 ڈالر فی ایم ایم بی ٹی یو مقرر کی گئی ہے، جبکہ تقسیمی قیمت 32.35 فیصد بڑھ کر 19.5228 ڈالر سے 25.8388 ڈالر فی ایم ایم بی ٹی یو ہو گئی ہے۔

اسی طرح ایس ایس جی سی ایل کے لیے ترسیلی قیمت 16.3679 ڈالر سے بڑھ کر 22.2251 ڈالر فی ایم ایم بی ٹی یو ہو گئی، جو 35.78 فیصد اضافہ ظاہر کرتی ہے، جبکہ تقسیمی قیمت 34.62 فیصد اضافے کے بعد 18.6360 ڈالر سے بڑھ کر 25.0872 ڈالر فی ایم ایم بی ٹی یو مقرر کی گئی ہے۔

اوگرا کے مطابق آر ایل این جی کی نظرثانی شدہ قیمتوں کا تعین وفاقی حکومت کی پالیسی گائیڈ لائنز کے مطابق کیا گیا ہے، اور ان کا اطلاق یکم جولائی 2026 سے ہوگا۔