حکومت کا 10 لاکھ ٹن گندم درآمد کرنے کا فیصلہ

ملکی رسد اور طلب کے فرق کو پورا کرنے کے لیے حکومت نے مارکیٹ میں قیمتوں کو مستحکم کرنے کی غرض سے دس لاکھ ٹن گندم درآمد کرنے اور پاکستان ایگریکلچرل اسٹوریج اینڈ سروسز کارپوریشن (پاسکو) کے پاس موجود گندم کا موجودہ ذخیرہ تمام صوبوں کو ان کی ضروریات کے مطابق جاری کرنے کا فیصلہ کیا ہے۔

وفاقی وزیرخوراک نے کہا ہے کہ حکومت نے ملکی طلب پوری کرنے اور مارکیٹ کا استحکام یقینی بنانے کے لیے دس لاکھ ٹن گندم درآمد کرنے کا فیصلہ کیا ہے۔

یہ فیصلہ وفاقی حکومت اور تمام صوبائی حکومتوں کے درمیان ہونے والے ایک اجلاس کے دوران کیا گیا، اجلاس میں گندم ذخائر، قیمتوں اور رسد کی صورتحال کا تفصیلی جائزہ لیا گیا۔

وفاقی وزیر نے کہا کہ حکومت عوام کو سستی اور معیاری گندم کی دستیابی کو یقینی بنانے کے لیے تمام ممکنہ کوششیں ک رہی ہے۔ انہوں نے کہا کہ اجلاس میں اس بات پر اتفاق کیا گیا کہ پاسکو کے پاس موجود گندم کے موجودہ ذخائر فوری طور پر صوبوں کو جاری کیے جائیں گے۔

انہوں نے مزید کہا کہ اجلاس میں ملکی ضروریات کو پورا کرنے اور اندرونی مارکیٹ میں استحکام کو یقینی بنانے کے لیے دس لاکھ ٹن گندم درآمد کرنے پر بھی اتفاق کیا گیا۔

ایک سرکاری عہدیدار نے بتایا کہ یہ فیصلہ گندم اور آٹے کی قیمتوں میں اضافے کے بعد کیا گیا۔ جولائی 2026 کے پہلے ہفتے میں گندم کی اوسط قیمت 4,611 روپے فی 40 کلوگرام (115 روپے فی کلو) تھی جو کہ ایک ہفتہ قبل 4,516 روپے تھی۔ انہوں نے بتایا کہ صوبائی لحاظ سے اس وقت گندم کی قیمت پنجاب میں 4,423 روپے، سندھ میں 4,625 روپے، خیبر پختونخوا میں 5,100 روپے اور بلوچستان میں 4,800 روپے ہے۔