گندھارا ٹائر کو امریکہ برآمدات کی اجازت مل گئی، اہم ریگولیٹری سرٹیفیکیشن حاصل

پاکستانی ٹائر ساز کمپنی گندھارا ٹائر اینڈ ربر کمپنی لمیٹڈ (جی ٹی وائے آر) نے امریکی محکمہ ٹرانسپورٹ (ڈی او ٹی) کی سرٹیفیکیشن حاصل کرلی ہے جس کے بعد اب کمپنی امریکہ کو ٹائر برآمد کرسکے گی۔

کمپنی نے بدھ کو پاکستان اسٹاک ایکسچینج (پی ایس ایکس) کو بھیجے گئے ایک نوٹس میں اس پیشرفت سے آگاہ کیا۔

نوٹس میں کہا گیا ہے کہ کمپنی نے کامیابی کے ساتھ امریکی محکمۂ ٹرانسپورٹ کا سرٹیفکیٹ حاصل کر لیا ہے جس کے بعد اسے امریکہ کو ٹائر برآمد کرنے کی اجازت مل گئی ہے۔ کمپنی کے تیار کردہ ٹائر امریکی وفاقی موٹر وہیکل سیفٹی اسٹینڈرڈز کے تمام متعلقہ تقاضوں پر پورا اترتے ہیں۔

یہ امر قابلِ ذکر ہے کہ امریکی محکمۂ ٹرانسپورٹ کا سرٹیفکیٹ اس بات کی تصدیق کرتا ہے کہ گاڑیاں اور ان کے آپریٹرز فیڈرل موٹر کیریئر سیفٹی ایڈمنسٹریشن کی جانب سے مقرر کردہ قومی حفاظتی معیارات پر پورا اترتے ہیں۔

جی ٹی وائی آر نے کہا کہ یہ سرٹیفیکیشن کمپنی کی برآمدی پورٹ فولیو کو بڑھانے، نئی بین الاقوامی منڈیوں کو تلاش کرنے اور عالمی ٹائر انڈسٹری میں اپنی پوزیشن کو مستحکم کرنے پر زور دینے کے عین مطابق ہے۔

کمپنی ابھرتے ہوئے مواقع سے فائدہ اٹھانے اور اپنے اسٹیک ہولڈرز کو پائیدار قدر فراہم کرنے کے لیے پرعزم ہے۔

گندھارا ٹائر اینڈ ربر کمپنی لمیٹڈ جسے پہلے دی جنرل ٹائر اینڈ ربر کمپنی کے نام سے جانا جاتا تھا، 1963 میں کمپنیز ایکٹ 1913 (جسے بعد میں کمپنیز آرڈیننس 1984 کے ذریعے منسوخ کر دیا گیا) کے تحت ایک پرائیویٹ لمیٹڈ کمپنی کے طور پر قائم کی گئی تھی۔ بعد ازاں اسے پبلک لمیٹڈ کمپنی میں تبدیل کر دیا گیا تھا۔

کمپنی کا بنیادی کاروبار آٹوموبائل اور موٹر سائیکلوں کے لیے ٹائر اور ٹیوبز کی تیاری اور تجارت ہے۔