پی سی بی اور سعودی کرکٹ فیڈریشن کا جدہ میں بین الاقوامی کرکٹ اسٹیڈیم تعمیر کرنے کا معاہدہ

پاکستان کرکٹ بورڈ (پی سی بی) اور سعودی عربین کرکٹ فیڈریشن (ایس اے سی ایف) نے جدہ میں عالمی معیار کا جدید بین الاقوامی کرکٹ اسٹیڈیم تعمیر کرنے کے لیے ایک تاریخی اسٹریٹجک معاہدے پر دستخط کر دیے ہیں۔ دونوں کرکٹ اداروں کے درمیان اپنی نوعیت کا یہ پہلا تعاون ہے۔

یہ معاہدہ پی سی بی کے چیئرمین محسن نقوی اور سعودی عربین کرکٹ فیڈریشن کے چیئرمین شہزادہ سعود بن مشعل آل سعود کے درمیان ہونے والی ملاقات کے دوران طے پایا۔

معاہدے کے تحت پاکستان کرکٹ بورڈ جدہ میں جدید بین الاقوامی کرکٹ اسٹیڈیم کی تعمیر کی نگرانی کرے گا، جس میں انٹرنیشنل کرکٹ کونسل (آئی سی سی) کے معیار کے مطابق تمام جدید سہولیات فراہم کی جائیں گی۔

دونوں کرکٹ بورڈز سعودی عرب میں کرکٹ کے فروغ کے لیے انفراسٹرکچر کی ترقی، تکنیکی مہارت، اسٹیڈیم کی منصوبہ بندی اور آپریشنل معیار کے شعبوں میں بھی باہمی تعاون کریں گے۔

پی سی بی کے مطابق یہ منصوبہ سعودی عرب کو مستقبل میں بین الاقوامی کرکٹ میچز اور بڑے کھیلوں کے مقابلوں کی میزبانی کے قابل بنانے میں اہم کردار ادا کرے گا۔ اس کے ساتھ ساتھ یہ سعودی وژن 2030 کے اہداف کے تحت کھیلوں میں سرمایہ کاری، اسپورٹس ٹورازم، عوامی شرکت اور معیارِ زندگی کو بہتر بنانے میں بھی معاون ثابت ہوگا۔

اس موقع پر محسن نقوی نے معاہدے کو سعودی عرب میں کرکٹ کے فروغ کے لیے ایک اہم سنگِ میل قرار دیتے ہوئے کہا کہ یہ شراکت داری نہ صرف کھیل کو فروغ دے گی بلکہ عالمی کرکٹ برادری کے درمیان تعاون اور روابط کو بھی مزید مضبوط بنائے گی۔