مضبوط ڈالر کے باعث سونا مسلسل تیسرے ہفتے کمی کی طرف گامزن

عالمی منڈی میں جمعے کے روز سونے کی قیمتوں میں کمی دیکھی گئی اور یہ مسلسل تیسری ہفتہ وار کمی کی طرف بڑھ رہی ہیں، جس کی بڑی وجہ امریکی ڈالر کی مضبوطی اور امریکی فیڈرل ریزرو کے سخت مالیاتی اشارے ہیں۔

اسپاٹ گولڈ 0.6 فیصد کمی کے بعد 4,184.33 ڈالر فی اونس پر آ گیا، جبکہ ہفتہ وار بنیاد پر یہ اب تک 0.9 فیصد نیچے ہے۔ اگست کے لیے امریکی گولڈ فیوچرز بھی 1 فیصد کمی کے ساتھ 4,202.10 ڈالر فی اونس پر آ گئے۔

مارکیٹ ذرائع کے مطابق چین اور ہانگ کانگ میں ڈریگن بوٹ فیسٹیول کی تعطیلات کے باعث تجارتی سرگرمیاں محدود رہیں۔

ڈالر ایک سال کی بلند ترین سطح کے قریب مستحکم رہا، جس کے باعث دیگر کرنسیوں کے حامل سرمایہ کاروں کے لیے سونا مزید مہنگا ہو گیا۔ ماہرین کے مطابق مضبوط ڈالر قیمتی دھاتوں پر دباؤ بڑھا رہا ہے۔

کے سی ایم ٹریڈ کے چیف مارکیٹ اینالسٹ ٹم واٹرر نے کہا کہ امریکا-ایران امن معاہدے کے بعد سونے کی قیمتوں میں آنے والا اضافہ عارضی ثابت ہوا ہے، جبکہ فیڈرل ریزرو کے سخت مؤقف نے مارکیٹ کی سمت تبدیل کر دی ہے۔

انہوں نے کہا کہ نئی قیادت کے تحت امریکی مالیاتی پالیسی کا سخت رویہ جیوپولیٹیکل اثرات کو کم کر رہا ہے اور اب مرکزی بینک کی پالیسی ہی مارکیٹ کو کنٹرول کر رہی ہے۔

فیڈرل ریزرو کے 19 میں سے 9 پالیسی سازوں کا خیال ہے کہ اس سال شرح سود میں اضافہ کرنا پڑ سکتا ہے۔ یہ اعداد و شمار بدھ کو جاری کیے گئے جب مرکزی بینک نے شرح سود کو برقرار رکھا۔

مارکیٹوں میں اب دسمبر میں شرح سود میں اضافے کے 87 فیصد امکانات ظاہر کیے جا رہے ہیں، جو پہلے 61 فیصد تھے۔

چونکہ سونا سود نہیں دیتا، اس لیے بلند شرح سود کے ماحول میں اس کی کشش کم ہو جاتی ہے۔

گولڈمین سیکس نے سونے کی قیمتوں کا ہدف کم کر کے 4,900 ڈالر فی اونس کر دیا ہے، جبکہ پہلے یہ 5,400 ڈالر تھا۔

دوسری جانب جغرافیائی سیاسی محاذ پر آبنائے ہرمز سے تیل بردار جہازوں کی آمدورفت بحال ہوئی اور امریکا نے ایران پر عائد کچھ پابندیاں ختم کرنے کا اعلان بھی کیا۔

دیگر قیمتی دھاتوں میں چاندی 1.5 فیصد کمی کے ساتھ 64.83 ڈالر فی اونس، پلاٹینم 1.3 فیصد کمی کے ساتھ 1,674.47 ڈالر اور پیلیڈیم 0.8 فیصد کمی کے ساتھ 1,268.65 ڈالر فی اونس پر آ گیا۔