امریکا ایران امن معاہدے کی خبر، سونے کی قیمت 2 فیصد بڑھ گئی

عالمی منڈی میں سونے کی قیمت پیر کے روز 2 فیصد بڑھ گئی، کیونکہ امریکی اور ایرانی حکام نے اپنے تنازع کے خاتمے کے لیے ایک ابتدائی معاہدے تک پہنچنے کا اعلان کیا۔ اس پیش رفت کے بعد تیل کی قیمتوں میں کمی آئی اور مہنگائی و بلند شرح سود سے متعلق خدشات میں بھی کمی دیکھی گئی۔

اسپاٹ گولڈ کی قیمت 2 فیصد اضافے کے ساتھ 4,304.11 ڈالر فی اونس تک پہنچ گئی، جو 9 جون کے بعد بلند ترین سطح ہے۔ جبکہ اگست کے لیے امریکی گولڈ فیوچرز 2 فیصد اضافے کے ساتھ 4,325.20 ڈالر فی اونس پر ٹریڈ ہوئے۔

امریکا اور ایران نے اتوار کو اعلان کیا تھا کہ دونوں ممالک جنگ کے خاتمے، ایرانی بندرگاہوں پر امریکی ناکہ بندی ختم کرنے اور آبنائے ہرمز کو دوبارہ کھولنے کے فریم ورک پر متفق ہو گئے ہیں۔ وزیراعظم شہباز شریف کے مطابق اس معاہدے پر جمعہ کو سوئٹزرلینڈ میں باضابطہ دستخط کیے جائیں گے۔

معاہدے کی خبر کے بعد امریکی ڈالر 10 روز کی کم ترین سطح پر آ گیا، جبکہ تیل کی قیمتوں میں 4 فیصد سے زائد کمی ریکارڈ کی گئی۔ ماہرین کے مطابق کمزور ڈالر اور تیل کی گرتی قیمتوں نے سونے کی طلب کو سہارا دیا ہے۔

دیگر قیمتی دھاتوں میں بھی اضافہ دیکھا گیا، جہاں چاندی 3.1 فیصد اضافے کے ساتھ 70.07 ڈالر، پلاٹینم 3.1 فیصد بڑھ کر 1,771.27 ڈالر اور پیلیڈیم 3.3 فیصد اضافے کے ساتھ 1,325.76 ڈالر فی اونس تک پہنچ گیا۔