رومانیہ کے صدر نے وزیرِاعظم کیلئے نیا امیدوار نامزد کر دیا

رومانیہ کے سینٹرلسٹ صدر نکوسور ڈین نے اتوار کے روز لبرل پارٹی کے رکن ایڈرین ویسٹیا کو نیا وزیرِاعظم نامزد کر دیا ہے۔ یہ فیصلہ اس وقت کیا گیا جب آزاد امیدوار یوجین ٹوماک نے حکومت سازی کے عمل سے دستبرداری اختیار کر لی۔

52 سالہ ایڈرین ویسٹیا وسطی رومانیہ کے علاقے براشوف کے کاؤنٹی کونسل کے صدر ہیں۔ یوجین ٹوماک ایک ٹیکنوکریٹ حکومت کی قیادت کے خواہاں تھے، تاہم انہیں پارلیمنٹ میں سیاسی جماعتوں کی مطلوبہ حمایت حاصل نہ ہو سکی۔

صدر نکوسور ڈین نے کہا کہ یوجین ٹوماک نے آج صبح اپنا مینڈیٹ واپس لے لیا، اس لیے میں ایڈرین ویسٹیا کو وزیرِاعظم نامزد کرتا ہوں۔ اس وقت یہ واضح ہے کہ سیاسی حکومت ہی درست حل ہے۔

پارلیمانی جماعتوں نے اس سے قبل مؤقف اختیار کیا تھا کہ ٹیکنوکریٹس کے بجائے اقلیتی سیاسی حکومت زیادہ بہتر آپشن ہو سکتی ہے۔

صدر ڈین ملک میں جاری سیاسی بحران کے خاتمے کی کوشش کر رہے ہیں، جس نے قانون سازی کے عمل کو مفلوج کر دیا ہے اور یورپی یونین فنڈز تک رسائی کو بھی خطرے میں ڈال دیا ہے۔ ساتھ ہی ملکی کرنسی لیو کی قدر ریکارڈ نچلی سطح تک گر چکی ہے۔

نئے نامزد وزیرِاعظم ایڈرین ویسٹیا کے پاس 10 دن کا وقت ہوگا کہ وہ حکومت تشکیل دیں اور پارلیمنٹ سے اعتماد کا ووٹ حاصل کریں۔

رومانیہ میں اگلے پارلیمانی انتخابات 2028 میں متوقع ہیں، جبکہ ماہرین کے مطابق قبل از وقت انتخابات کے امکانات کم ہیں۔