چین اور شمالی کوریا کے تعلقات نئے دور میں داخل ہوگئے، شی جن پنگ

چین کے صدر شی جن پنگ نے پیر کے روز کہا ہے کہ چین اور شمالی کوریا کے تعلقات نئے تاریخی دور میں داخل ہو چکے ہیں۔ یہ بیان شمالی کوریا کے سرکاری میڈیا میں ان کی آمد سے قبل شائع کیا گیا، جہاں وہ رہنما کم جونگ اُن کے ساتھ ایک غیر معمولی سربراہی اجلاس میں شرکت کے لیے پہنچ رہے ہیں۔

شی جن پنگ نے روزنامہ روڈونگ سنمون میں شائع ہونے والے مضمون میں کہا کہ چین کی غیر متزلزل پالیسی شمالی کوریا کے ساتھ تعلقات کو فروغ دینا ہے اور دونوں ممالک ہر شعبے میں تبادلے کو مزید مضبوط کریں گے۔ ان کا یہ دورہ اس لحاظ سے اہم قرار دیا جا رہا ہے کہ یہ رواں سال ان کا پہلا غیر ملکی دورہ ہے۔

انہوں نے کہا کہ ہمیں تسلط پسندی، آمریت اور ان تمام کوششوں اور سازشوں کی مخالفت کرنی چاہیے جو عسکریت پسندی کو دوبارہ زندہ کر کے خطے کے امن و استحکام کو خطرے میں ڈالتی ہیں۔

شی جن پنگ شمالی کوریا کے ساتھ دو روزہ دورے کے دوران کم جونگ اُن سے مذاکرات کریں گے۔ یہ ان کا سات سال بعد اس تنہا ملک کا پہلا دورہ ہے، ایسے وقت میں جب شمالی کوریا کی معیشت روس کے ساتھ بڑھتی ہوئی تجارت اور فوجی تعلقات کے باعث مضبوط ہو رہی ہے۔

ایشیا سوسائٹی کے سینئر فیلو جان ڈیلوری نے کہا کہ یہ دورہ تبدیل شدہ حالات میں روایت کو برقرار رکھنے کے لیے ہے، جو گزشتہ دورے سے مختلف ہیں۔

شی جن پنگ کے مضمون میں چین اور شمالی کوریا کی روایتی دوستی کو سراہتے ہوئے اسٹریٹجک تعاون اور سوشلزم پر زور دیا گیا ہے۔ انہوں نے کہا کہ دونوں ممالک عالمی سطح پر منصفانہ اور منظم کثیرالجہتی نظام اور جامع معاشی گلوبلائزیشن کے فروغ کے لیے کام کریں گے۔

دورے سے قبل پیانگ یانگ میں چینی اور شمالی کوریائی پرچموں سے سڑکیں سجائی گئیں جبکہ سرکاری خبر رساں ایجنسی ژنہوا نے ایک ویڈیو جاری کی جس میں استقبال کے بینرز اہم عمارتوں پر آویزاں دکھائے گئے۔

چین کے صدر خصوصی طیارے کے ذریعے بیجنگ سے روانہ ہوئے، ان کے ہمراہ ان کی اہلیہ پینگ لی یوان، چیف آف اسٹاف کائی چی اور وزیر خارجہ وانگ یی بھی موجود تھے۔

دورے کے موقع پر شمالی کوریا نے اپنی بحری طاقت کا اظہار کرتے ہوئے 10,000 ٹن کے نئے جنگی جہاز کے منصوبے کا اعلان کیا اور خود کو ایک جوہری طاقت کے طور پر دوبارہ اعلان کیا۔