میکسیکو نے سربیا کو یکطرفہ مقابلے میں 5-1 سے شکست دے دی

میکسیکو نے اپنے آخری وارم اپ میچ میں سربیا کو 1-5 سے شکست دے کر ہوم گراؤنڈ پر ورلڈ کپ کے آغاز سے ایک ہفتہ قبل اپنی تیاریاں مکمل کر لیں۔

میچ کے 19ویں منٹ میں سربیا نے اس وقت برتری حاصل کی جب پیٹر اسٹینک نے میکسیکو کی دفاعی غلطی کا فائدہ اٹھایا اور پہلا گول داغ دیا، تاہم 34ویں منٹ میں جوہان واسکیز نے ہیڈر کے ذریعے گول کرکے اسکور برابر کر دیا۔میکسیکو نے پہلے ہاف کے انجری ٹائم میں اس وقت میچ کا رخ موڑ دیا جب سربیا کے اسٹیفن بوکیناک نے اپنی ہی ٹیم کے خلاف اون گول کر کے ہوم ٹیم کو 1-2 کی برتری دلا دی۔ دوسرے ہاف کے 12ویں منٹ میں راؤل جیمینیز نے گیند کو نیٹ میں پہنچا کر برتری 1-3 کر دی۔

میچ کے 72ویں منٹ میں ایڈم ایوڈک نے الیکس ویگا کے کارنر پر ایک بار پھر اون گول کرکے میکسیکو کو 1-4 کی برتری دلائی جبکہ میچ ختم ہونے سے کچھ دیر قبل لوئس چاویز نے شاندار لانگ رینج اسٹرائیک پر پانچواں گول کرکے سربیا کی شکست پر مہر لگا دی۔ اس شاندار جیت کے بعد میکسیکو آئندہ جمعرات کو جنوبی افریقہ کے خلاف ورلڈ کپ کے افتتاحی میچ میں شرکت کرے گا۔ یہ میگا ایونٹ میکسیکو، امریکا اور کینیڈا کی مشترکہ میزبانی میں کھیلا جا رہا ہے۔