امریکی حملوں کے بعد ایران ڈیل کے لیے جاری مذاکرات پر تشویش کے بادل منڈلانے لگے

امریکی افواج نے جنوبی ایران میں میزائل سائٹس اور خلیج کے پانیوں میں مبینہ طور پر بارودی سرنگیں بچھانے والی کشتیوں پر رات گئے حملے کیے ہیں، جس کے بعد منگل کو تیل کی قیمتوں میں اضافہ دیکھا گیا اور ایک ایسے وقت میں کشیدگی مزید بڑھ گئی ہے جب سفارت کار جنگ کے خاتمے کے لیے کسی معاہدے تک پہنچنے کی کوششوں میں مصروف ہیں۔

امریکی سینٹرل کمانڈ (سکارم) کی جانب سے بمباری کی نئی لہر کے اعلان کے بعد عالمی مارکیٹ میں خام تیل کی قیمتوں کے بینچ مارک ’برینٹ کروڈ‘ میں تقریباً تین فیصد کا اچھال آیا، جبکہ چین نے دونوں فریقین پر زور دیا ہے کہ وہ جنگ بندی کا احترام کریں اور اپنے تنازعات پرامن طریقے سے حل کریں۔

ایرانی سرکاری میڈیا نے جنوبی بندرگاہی شہر بندر عباس میں دھماکوں کی اطلاع دی ہے، جبکہ پاسدارانِ انقلابِ اسلامی (آئی آر جی سی) نے دعویٰ کیا ہے کہ ان کے دستوں نے اپنی فضائی حدود میں داخل ہونے والے ایک امریکی ڈرون کو مار گرایا اور ایک ایف-35 لڑاکا طیارے پر فائرنگ کی ہے۔

عید الاضحیٰ کی مناسبت سے جاری کردہ ایک بیان میں تہران کے رہبرِ اعلیٰ آیت اللہ مجتبیٰ خامنہ ای نے اعلان کیا کہ واشنگٹن مشرقِ وسطیٰ میں اپنا اثر و رسوخ کھو رہا ہے۔ انہوں نے خطے کے ممالک کو خبردار کیا کہ وہ اس بات کو یقینی بنائیں کہ ان کی سرزمین پر اب ایسے امریکی اڈے نہ ہوں جہاں سے ایران پر حملے کیے جا سکیں۔ اپنے تحریری بیان میں انہوں نے کہا کہ امریکہ خطے میں جارحیت اور فوجی اڈوں کے قیام کے لیے اب کوئی محفوظ پناہ گاہ نہ ہونے کے ساتھ ساتھ، ہر گزرتے دن کے ساتھ اپنی سابقہ پوزیشن سے مزید دور ہوتا جا رہا ہے۔

دوسری جانب امریکی سینٹرل کمانڈ کے ترجمان ٹم ہاکنز کا کہنا تھا کہ امریکی افواج نے آج جنوبی ایران میں اپنے فوجیوں کو ایرانی فورسز کی جانب سے لاحق خطرات سے بچانے کے لیے دفاعی حملے کیے ہیں۔

دیکھتے ہیں کیا ہوتا ہے

انہوں نے ان حملوں کی مزید تفصیلات فراہم نہیں کیں اور صرف اتنا بتایا کہ نشانہ بنائے گئے اہداف میں میزائل لانچنگ سائٹس اور وہ کشتیاں شامل تھیں جو بارودی سرنگیں نصب کرنے کی کوشش کر رہی تھیں۔

ان حملوں کے باوجود امریکی وزیرِ خارجہ مارکو روبیو نے منگل کے روز کہا کہ معاہدہ اب بھی ممکن ہے۔ تاہم وہ آبنائے ہرمز کے مستقبل کے حوالے سے اپنے مؤقف پر قائم رہے، جو کہ خلیج سے تیل اور گیس کی ترسیل کا اہم ترین بحری راستہ ہے اور ایران بحری جہازوں کے گزرنے کی منظوری کے بدلے فیس وصول کر کے اس پر اپنا کنٹرول حاصل کرنا چاہتا ہے۔

دورہِ بھارت کے دوران صحافیوں سے گفتگو کرتے ہوئے مارکو روبیو نے کہا کہ آج قطر میں کچھ بات چیت چل رہی ہے، اس لیے دیکھتے ہیں کہ آیا ہم کوئی پیش رفت کر پاتے ہیں یا نہیں۔ میرا خیال ہے کہ ابتدائی دستاویز کی مخصوص زبان کے حوالے سے کافی لے دے ہو رہی ہے، اس لیے اس میں چند دن لگیں گے۔ انہوں نے واضح کیا کہ یہ آبنائے ہر صورت کھلی رہے گی اور مزید کہا کہ وہاں جو کچھ ہو رہا ہے وہ غیر قانونی ہے، دنیا کے لیے ناقابلِ برداشت ہے اور کسی صورت قابلِ قبول نہیں۔

ان تازہ حملوں نے 8 اپریل سے شروع ہونے والی جنگ بندی کو خطرے میں ڈال دیا ہے، کیونکہ امریکہ اور ایران ایک ایسے معاہدے تک پہنچنے کے لیے جدوجہد کر رہے ہیں جو توانائی کی سپلائی میں شدید خلل کے باعث عالمی معیشت کو ہلا کر رکھ دینے والی اس جنگ کا خاتمہ کر سکے۔

واشنگٹن کے بڑے عالمی حریف اور توانائی کے بڑے درآمد کنندہ ملک، چین نے امریکی حملوں کے بعد گہری تشویش کا اظہار کیا ہے۔ وزارتِ خارجہ کی ترجمان ماؤ ننگ نے صحافیوں کو بتایا کہ ہم متعلقہ فریقین پر زور دیتے ہیں کہ وہ اپنے جنگ بندی کے وعدوں کو پورا کریں، تنازعات کو پرامن طریقوں سے حل کریں اور خطے میں جلد امن کی بحالی کو فروغ دیں۔

معاہدے کی امیدوں کو اس وقت ایک اور دھچکا لگا جب پیر کی شام اسرائیلی وزیرِ اعظم بنجمن نیتن یاہو نے لبنان میں حزب اللہ کو کچلنے کا عزم ظاہر کیا۔ ایران نے مطالبہ کر رکھا ہے کہ کسی بھی امن معاہدے کا اطلاق لبنان میں جاری لڑائی پر بھی ہونا چاہیے۔ منگل کے روز اسرائیل نے لبنانی شہریوں کو متوقع فضائی حملوں کے پیشِ نظر جنوبی شہر نبطیہ کو خالی کرنے کی وارننگ بھی جاری کی ہے۔

جوہری ایندھن کو تلف کرنا

امریکی صدر ڈونلڈ ٹرمپ نے سوشل میڈیا پر ایک پوسٹ میں کہا کہ وہ توقع کرتے ہیں کہ ایران اپنا افزودہ یورینیم تلف کرنے کے لیے امریکہ کے حوالے کر دے یا پھر اسے بین الاقوامی مبصرین کی موجودگی میں خود ایران ہی کے اندر تباہ کیا جائے۔ انہوں نے کہا کہ یہ جوہری ایندھن یا تو فوری طور پر امریکہ کے حوالے کر دیا جائے گا، تاکہ اسے واپس لا کر تباہ کیا جا سکے یا پھر بہتر یہ ہو گا کہ اسے اسلامی جمہوریہ ایران کے ساتھ مل کر اور باہمی تعاون سے اسی جگہ یا کسی دوسرے قابلِ قبول مقام پر تلف کر دیا جائے۔