خام تیل کی قیمتوں میں اضافہ ریکارڈ

خام تیل کی قیمتوں میں جمعہ کو اضافہ ریکارڈ کیا گیا، کیونکہ سرمایہ کاروں کو تشویش تھی کہ امریکہ اور ایران کسی ایسے امن معاہدے پر پہنچنے میں ناکام رہیں گے جس کے نتیجے میں آبنائے ہرمز میں بحری آمدورفت معمول پر نہیں آ سکے گی۔

برینٹ کروڈ (خام تیل) کے مستقبل کے سودے (فیوچرز) 96 سینٹس یا 0.94 فیصد اضافے کے ساتھ 103.54 امریکی ڈالر فی بیرل پر بند ہوئے۔ دوسری جانب امریکی ویسٹ ٹیکساس انٹرمیڈیٹ (ڈبلیو ٹی آئی) کے سودے 25 سینٹس یا 0.26 فیصد اضافے کے ساتھ 96.60 امریکی ڈالر فی بیرل پر ختم ہوئے۔

سیشن کے آغاز میں برینٹ اور ڈبلیو ٹی آئی کی قیمتوں میں 3 فیصد سے زائد کا اضافہ ہوا تھا، تاہم ہفتہ وار بنیادوں پر برینٹ کی قیمت میں 5.48 فیصد اور ڈبلیو ٹی آئی میں 8.37 فیصد کی کمی ریکارڈ کی گئی، ایران اور امریکہ کے درمیان امن معاہدے کی توقعات میں اتار چڑھاؤ کے باعث قیمتیں مسلسل غیر مستحکم رہیں۔

پرائس فیوچرز گروپ کے سینئر تجزیہ کار فل فلن کا کہنا تھا کہ ہمارے سامنے یکے بعد دیگرے اتنی زیادہ ہیڈلائنز آرہی ہیں کہ ان کا ساتھ دینا مشکل ہورہا ہے۔ اب کہانی یہ ہے کہ ایران پابندیوں کے خاتمے کے بدلے یورینیم فراہم کرے گا لیکن اخبار کی سیاہی خشک ہونے سے پہلے ہی وہ خبر بدل دیتے ہیں۔

اسلام آباد میں ایک سفارتی ذرائع نے ایران کی سرکاری نیوز ایجنسی ارنا کو بتایا کہ پاکستان کے آرمی چیف ایران کے لیے روانہ ہوچکے ہیں۔ اس سے قبل ایک اعلیٰ ایرانی ذرائع نے رائٹرز کو بتایا تھا کہ امریکہ کے ساتھ اختلافات (خلیج) کم ہوئے ہیں جبکہ امریکی وزیرِ خارجہ مارکو روبیو نے بھی مذاکرات میں کچھ اچھے اشاروں کا تذکرہ کیا ہے۔

روبیو نے سویڈن میں نیٹو کے وزرائے خارجہ کے اجلاس کے بعد صحافیوں سے گفتگو کرتے ہوئے کہا کہ کچھ پیش رفت ہوئی ہے۔ میں نہ تو اس کی اہمیت کو بڑھا چڑھا کر پیش کروں گا اور نہ ہی اسے کم تر سمجھوں گا۔ انہوں نے مزید کہا کہ ابھی مزید کام کرنا باقی ہے، ہم ابھی منزل تک نہیں پہنچے۔ مجھے امید ہے کہ ہم وہاں پہنچ جائیں گے۔

روبیو کا کہنا تھا کہ امریکہ پاکستانیوں کے ساتھ مسلسل رابطے میں ہے جو ایران کے ساتھ ان مذاکرات میں سہولت کاری کا کردار ادا کر رہے ہیں۔

دونوں ممالک تہران کے یورینیم کے ذخائر اور آبنائے ہرمز کے کنٹرول پر تاحال منقسم ہیں۔ اگین کیپیٹل کے پارٹنر جان کلڈف کا کہنا تھا کہ میرا خیال ہے کہ ہم پوری طرح سے ہیڈلائنز کے رحم و کرم پر ہیں۔ ایسا لگتا ہے کہ ہم کسی حل کی طرف بڑھ رہے ہیں لیکن معاملات میں واضح پن کا معیار غیر معمولی ہے۔

روبیو نے یہ بھی کہا کہ امریکہ نے آبنائے ہرمز کو دوبارہ کھولنے کے لیے نیٹو اتحادیوں سے مدد کی کوئی درخواست نہیں کی ہے۔