مضبوط ڈالر اور بڑھتی بانڈ ییلڈز، سونے کی قیمتوں میں کمی

عالمی مارکیٹ میں بدھ کے روز سونے کی قیمتوں میں معمولی کمی ریکارڈ کی گئی، کیونکہ امریکی ٹریژری بانڈز کی بڑھتی ہوئی ییلڈز اور مضبوط ڈالر نے امریکہ اور ایران کے درمیان ممکنہ امن معاہدے سے متعلق امیدوں کو پس منظر میں دھکیل دیا۔

اسپاٹ گولڈ کی قیمت 0.3 فیصد کمی کے بعد 4,467.59 ڈالر فی اونس تک آ گئی، جبکہ جون ڈیلیوری کے لیے امریکی گولڈ فیوچرز 0.9 فیصد کمی کے ساتھ 4,471.10 ڈالر پر ٹریڈ ہوئے۔ گزشتہ سیشن میں سونا 30 مارچ کے بعد اپنی کم ترین سطح تک گر گیا تھا۔

کے سی ایم ٹریڈ کے چیف مارکیٹ تجزیہ کار ٹم واٹرر کے مطابق بڑھتی ہوئی بانڈ ییلڈز اور مضبوط ڈالر کے باعث سونے کی قیمتوں پر دباؤ برقرار ہے۔ ان کا کہنا تھا کہ شرح سود سے متعلق سخت مؤقف نے ڈالر کو مزید مضبوط کیا ہے، جس کے نتیجے میں سرمایہ کار سونے سے دور ہو رہے ہیں۔

امریکی ڈالر چھ ہفتوں کی بلند ترین سطح کے قریب برقرار رہا، جس سے دیگر کرنسیوں کے حامل سرمایہ کاروں کے لیے سونا مہنگا ہو گیا۔ اسی طرح 10 سالہ امریکی ٹریژری بانڈز کی ییلڈ ایک سال سے زائد کی بلند ترین سطح پر مستحکم رہی، جس سے بغیر منافع والے اثاثے یعنی سونے کی کشش کم ہوئی۔

امریکہ کی جانب سے ایران کے حوالے سے متضاد اشارے بھی سامنے آئے۔ امریکی صدر ڈونلڈ ٹرمپ نے خبردار کیا کہ واشنگٹن کو تہران پر دوبارہ حملہ کرنا پڑ سکتا ہے، جبکہ نائب صدر جے ڈی وینس نے کہا کہ دونوں ممالک مذاکرات میں پیش رفت کر رہے ہیں اور دوبارہ تنازع نہیں چاہتے۔

دوسری جانب چاندی کی قیمت 0.8 فیصد کمی کے ساتھ 73.22 ڈالر فی اونس، پلاٹینم 0.5 فیصد کمی کے بعد 1,912.67 ڈالر جبکہ پیلیڈیم 0.2 فیصد اضافے کے ساتھ 1,356.32 ڈالر فی اونس پر پہنچ گیا۔