جنگ کے آغاز سے لے کر اب تک کی طویل ترین بندش کے بعد ایران اسٹاک ایکسچینج دوبارہ کھل گئی

ایران نے منگل کو اپنی اسٹاک ایکسچینج دوبارہ کھول دی، جو تاریخ کی سب سے طویل بندش تھی اور امریکہ اور اسرائیل کے ساتھ جاری جنگ کی وجہ سے رک گئی تھی۔ یہ بات مقامی میڈیا نے رپورٹ کی ہے۔

معاشی روزنامہ دنیاِ اقتصاد کے مطابق ”تقریباً 80 دن کے بعد… آج صبح تہران اسٹاک ایکسچینج دوبارہ کھل گیا۔“

تجارت اس وقت معطل کی گئی تھی جب 28 فروری کو اسرائیل اور امریکہ کے حملوں کے جواب میں تہران نے پورے خطے میں میزائل اور ڈرون حملے کیے تھے۔

مارکیٹ 8 اپریل کو نافذ ہونے والی نازک جنگ بندی کے باوجود بند رہی۔

اہم عالمی اسٹاک ایکسچینجز کے برعکس، ایران کی اسٹاک مارکیٹ زیادہ تر بین الاقوامی مالی نظام سے الگ کام کرتی ہے، جس کی وجہ دہائیوں سے جاری پابندیاں اور غیر ملکی سرمایہ کاری پر قدغنیں ہیں۔

سرکاری خبر رساں ایجنسی ارنا کے مطابق جنگ سے متاثر ہونے والی 40 سے زائد کمپنیوں کے شیئرز ، جن میں کیمیکل اور دھات کے شعبے کی کمپنیاں شامل ہیں، ”اس وقت کے لیے معطل رہیں گے“۔

تقریباً 40 دن کے اس تنازعہ میں ایران کے اہم انفرااسٹرکچر پر حملے ہوئے، جن میں ملک کی دو بڑی اسٹیل فیکٹریاں بھی شامل ہیں، جو امریکی-اسرائیلی حملوں کے بعد بند کر دی گئیں۔