چین متفق ہے ایران ایٹمی ہتھیار نہیں بنا سکتا، ٹرمپ

امریکی صدر ڈونلڈ ٹرمپ نے کہا ہے کہ ایران کے حوالے سے ان کا صبر ختم ہو رہا ہے اور انہوں نے چین کے صدر شی جن پنگ کے ساتھ ملاقات میں اس بات پر اتفاق کیا ہے کہ ایران کو جوہری ہتھیار حاصل کرنے کی اجازت نہیں دی جا سکتی اور اسے آبنائے ہرمز دوبارہ کھولنا ہوگی۔

بیجنگ میں ہونے والی ملاقات کے بعد ٹرمپ نے کہا کہ ایران تنازع سمیت متعدد عالمی مسائل پر پیش رفت ہوئی ہے۔ ان کے مطابق ہم نے کئی ایسے مسائل حل کیے ہیں جنہیں دوسرے حل نہیں کر سکتے تھے۔

وائٹ ہاؤس کے مطابق دونوں رہنماؤں نے اس بات پر اتفاق کیا کہ آبنائے ہرمز کو کھلا رہنا چاہیے، جبکہ چین نے اس آبی گزرگاہ کی عسکریت کاری اور ممکنہ ٹول سسٹم کی مخالفت کی۔

ٹرمپ نے دعویٰ کیا کہ چین نے ایران کو فوجی سامان نہ دینے کا بھی وعدہ کیا ہے۔ انہوں نے کہا کہ ایران کے ساتھ جوہری مواد کے حوالے سے ان کا مؤقف سخت ہے اور وہ مزید صبر نہیں کریں گے۔

چین نے ایران جنگ پر براہِ راست تبصرہ نہیں کیا تاہم چینی وزارتِ خارجہ نے کہا کہ یہ تنازع کبھی ہونا ہی نہیں چاہیے تھا اور اس کے جاری رہنے کی کوئی وجہ نہیں۔

امریکی صدر نے ایران سے مطالبہ کیا کہ وہ معاہدہ کرے، جبکہ ایران نے جوہری پروگرام ختم کرنے سے انکار کرتے ہوئے اپنے مؤقف پر قائم رہنے کا اعلان کیا ہے۔

ادھر ماہرین کے مطابق اگرچہ امریکہ اور چین کے درمیان سفارتی کوششیں جاری ہیں، لیکن ایران اور امریکہ کے درمیان بات چیت تعطل کا شکار ہے۔

آبنائے ہرمز میں کشیدگی کے باعث عالمی توانائی سپلائی متاثر ہوئی ہے، جبکہ بحری حملوں اور کشتیوں پر قبضے کے واقعات بھی رپورٹ ہوئے ہیں۔

تجزیہ کاروں کے مطابق خطے میں بڑھتی ہوئی کشیدگی نہ صرف توانائی منڈیوں بلکہ عالمی سفارت کاری کے لیے بھی بڑا چیلنج بن چکی ہے، جبکہ ایران اب بھی پابندیوں کے خاتمے اور جنگی نقصان کے ازالے کا مطالبہ کر رہا ہے۔