آسٹریلیا میں بچی کی ہلاکت کے بعد پرتشدد احتجاج، ملزم پر قتل کا مقدمہ

آسٹریلیا کے ناردرن ٹیریٹری پولیس نے اتوار کے روز بتایا ہے کہ انہوں نے ایک شخص پر ایک مقامی (انڈیجینس) بچی کے قتل کا الزام عائد کر دیا ہے، جس کی موت کے بعد ایک دور افتادہ قصبے میں پرتشدد جھڑپیں بھی شروع ہو گئی تھیں۔

پولیس کے مطابق 47 سالہ جیفرسن لیوس پر 5 سالہ کمناجائی لٹل بیبی کے قتل کے علاوہ دو دیگر الزامات بھی عائد کیے گئے ہیں، جن کی تفصیلات قانونی وجوہات کی بنا پر ظاہر نہیں کی گئیں۔ پولیس کا کہنا ہے کہ ملزم نے خود کو قصبے کے نواحی کیمپ میں پیش کیا، جہاں سے اسے گرفتار کیا گیا۔

ناردرن ٹیریٹری پولیس کمشنر مارٹن ڈول نے کہا کہ یہ ایک انتہائی افسوسناک واقعہ ہے اور ہماری ہمدردیاں متاثرہ خاندان کے ساتھ ہیں۔ ملزم کو ہفتے کی رات گرفتار کیا گیا اور اسے منگل کے روز دارالحکومت ڈارون کی عدالت میں پیش کیا جائے گا۔

بچی کے قتل کے بعد تقریباً 400 مقامی افراد نے ایلس اسپرنگز کے قریب احتجاج کیا، جس دوران کچھ مظاہرین نے پتھراؤ کیا اور آگ لگا دی، جس سے پولیس اور امدادی اہلکار زخمی ہوئے اور گاڑیوں کو نقصان پہنچا۔ پولیس نے ہجوم کو منتشر کرنے کے لیے آنسو گیس کا استعمال کیا۔

حکام نے تمام فریقین سے پرامن رہنے کی اپیل کی ہے۔