سینیٹر مشتاق احمد کو اسرائیلی فورسز کی غیر قانونی حراست کے بعد رہا کر دیا گیا، اسحاق ڈار

وزیرِ خارجہ اسحاق ڈار نے جمعہ کے روز کہا ہے کہ سابق سینیٹر مشتاق احمد خان، جنہیں دیگر انسانی ہمدردی کے کارکنوں کے ساتھ گلوبل صمود فلوٹیلا میں سوار ہوتے ہوئے اسرائیلی قابض افواج نے غیر قانونی طور پر حراست میں لیا تھا، کو رہا کر دیا گیا ہے۔

انہوں نے بتایا کہ یہ رہائی متعدد فریقوں کی مشترکہ کوششوں کے بعد ممکن ہوئی۔

ایکس پر ایک پوسٹ میں اسحاق ڈار نے کہا ہے کہ یونانی حکام نے کریٹ، یونان میں ان کی رہائی میں سہولت فراہم کی، جس کے بعد ان کی محفوظ واپسی ممکن ہوئی۔

انہوں نے مزید کہا کہ ترک حکومت نے بھی ان کی استنبول منتقلی کے انتظامات میں اہم کردار ادا کیا، جہاں سے وہ پاکستان روانہ ہوں گے۔

اسحاق ڈار نے ان کی فوری اور مؤثر کارروائی کو سراہا، ساتھ ہی ایتھنز میں پاکستانی سفارتخانے کی معاونت کا بھی اعتراف کیا۔

انہوں نے کہا، ”میں فلوٹیلا میں سوار انسانی ہمدردی کے کارکنوں کی غیر قانونی حراست اور محصور غزہ کے عوام کے لیے بھیجی جانے والی انسانی امداد کی راہ میں رکاوٹ کی شدید ترین الفاظ میں مذمت کرتا ہوں۔“

انہوں نے مزید کہا کہ پاکستان ہمیشہ فلسطینی بھائیوں اور بہنوں کے ساتھ غیر مبہم اور غیر متزلزل حمایت جاری رکھے گا اور آئندہ بھی کرتا رہے گا۔