جولائی تا مارچ ٹیکسٹائل برآمدات میں معمولی کمی، حجم 13.545 ارب ڈالر رہا
- سوتی کپڑے کی برآمدات میں 10.94 فیصد، نٹ ویئر میں 1.14 فیصد، تولیوں اور مصنوعی ٹیکسٹائل کی برآمدات میں بھی بالترتیب 2.10 فیصد اور 10.56 فیصد کی گراوٹ
محکمہ شماریات پاکستان (پی بی ایس) کی رپورٹ کے مطابق رواں مالی سال کے پہلے نو ماہ (جولائی تا مارچ) کے دوران پاکستان کی ٹیکسٹائل برآمدات میں 0.50 فیصد کی معمولی کمی واقع ہوئی ہے، جس کا حجم گزشتہ سال کے 13.613 ارب ڈالر کے مقابلے میں 13.545 ارب ڈالر رہا۔
اعداد و شمار کے مطابق بعض شعبوں میں مثبت رجحان دیکھا گیا، جن میں ریڈی میڈ گارمنٹس کی برآمدات 3.77 فیصد اضافے کے ساتھ 3.208 ارب ڈالر اور بیڈ ویئر 0.25 فیصد اضافے سے 2.380 ارب ڈالر تک پہنچ گئیں۔ سب سے زیادہ نمایاں اضافہ خام کپاس کی برآمد میں دیکھا گیا جو 199 فیصد سے زائد اضافے کے ساتھ 2.606 ملین ڈالر رہی، جبکہ کاٹن یارن کی برآمدات میں بھی 4.42 فیصد اضافہ ریکارڈ کیا گیا۔
دوسری جانب سوتی کپڑے کی برآمدات میں 10.94 فیصد اور نٹ ویئر میں 1.14 فیصد کی کمی ریکارڈ کی گئی۔ اسی طرح تولیوں اور مصنوعی ٹیکسٹائل کی برآمدات میں بھی بالترتیب 2.10 فیصد اور 10.56 فیصد کی گراوٹ دیکھی گئی۔ مارچ 2026 میں سالانہ بنیادوں پر ٹیکسٹائل برآمدات میں 7.06 فیصد کمی آئی، تاہم فروری کے مقابلے میں مارچ میں برآمدات میں 1.36 فیصد کا معمولی اضافہ ہوا۔
مجموعی طور پر جولائی تا فروری کے عرصے میں ملکی برآمدات 7.27 فیصد کمی کے ساتھ 20.468 ارب ڈالر رہیں، جبکہ درآمدات 8.21 فیصد اضافے کے ساتھ 45.569 ارب ڈالر تک جا پہنچیں، جس کے نتیجے میں مجموعی تجارتی خسارہ 25.101 ارب ڈالر ریکارڈ کیا گیا۔
Comments