ایران جنگ جاری رہنے کا امکان، عالمی منڈی میں سونے کی قیمتیں گرگئیں

امریکی صدر ڈونلڈ ٹرمپ کی جانب سے ایران کے خلاف جنگ آئندہ چند ہفتوں تک جاری رکھنے کے بیان کے بعد جمعرات کے روز عالمی مارکیٹ میں سونے کی قیمتوں میں ایک فیصد سے زائد کمی ریکارڈ کی گئی، جس کے نتیجے میں چار روزہ مسلسل اضافہ بھی ختم ہو گیا۔

اسپاٹ گولڈ کی قیمت 1.3 فیصد کمی کے بعد 4694.48 ڈالر فی اونس تک پہنچ گئی، جبکہ امریکی گولڈ فیوچرز 1.9 فیصد کمی کے ساتھ 4723.70 ڈالر فی اونس پر آ گئے۔ اس سے قبل قیمتیں 19 مارچ کے بعد اپنی بلند ترین سطح پر پہنچ گئی تھیں۔

صدر ٹرمپ نے اپنے ٹیلی وژن خطاب میں کہا کہ امریکہ آئندہ دو سے تین ہفتوں کے دوران ایران پر مزید سخت حملے کرے گا اور اسے شدید نقصان پہنچایا جائے گا۔ انہوں نے دعویٰ کیا کہ امریکی اسٹریٹجک اہداف تقریباً حاصل کیے جا چکے ہیں اور جنگ جلد اپنے انجام کے قریب ہے۔

مارکیٹ ماہرین کے مطابق حالیہ کمی اس وجہ سے آئی کہ گزشتہ دو روز میں سونے کی قیمتوں میں غیر معمولی اضافہ ہوا تھا اور سرمایہ کاروں نے اسے حد سے زیادہ پرامید رجحان قرار دیتے ہوئے منافع وصول کیا۔ اس دوران تیل کی قیمتوں میں اضافہ اور ڈالر کی مضبوطی نے بھی سونے پر دباؤ ڈالا۔

برینٹ خام تیل کی قیمتوں میں چار فیصد سے زائد اضافہ دیکھا گیا جبکہ امریکی ڈالر اور دس سالہ ٹریژری ییلڈ میں بھی اضافہ ریکارڈ کیا گیا، جس سے ڈالر میں قیمت رکھنے والے سونے کی طلب متاثر ہوئی۔

مارچ کے دوران سونا گیارہ فیصد تک گر گیا تھا، جو 2008 کے بعد سب سے بڑی ماہانہ کمی تھی۔ یہ کمی ایران تنازع کے آغاز کے بعد سامنے آئی، جس نے عالمی افراط زر اور توانائی کی قیمتوں میں اضافہ کر کے مالیاتی پالیسی پر دباؤ بڑھایا ہے۔

فیڈرل ریزرو کے حکام کے مطابق موجودہ حالات میں شرح سود میں فوری تبدیلی کا امکان کم ہے، کیونکہ مہنگائی کے خطرات بدستور برقرار ہیں۔

دیگر دھاتوں میں، اسپاٹ سلور 2.9 فیصد گر کر 72.95 ڈالر، پلاٹینم 1.8 فیصد گر کر 1,928.26 ڈالر اور پیلیڈیم 1.4 فیصد گر کر 1,451.85 ڈالر پر آگیا۔