ایرانی گارڈز کا انتباہ: مزید رہنماؤں کے قتل پر امریکی ٹیک کمپنیوں کو نشانہ بنانے کی دھمکی

ایران کے پاسدارانِ انقلاب نے منگل کے روز کہا ہے کہ اگر مزید ایرانی رہنماؤں کو ”ہدف بناکر قتل“ کیا گیا تو وہ ایپل، گوگل اور میٹا جیسی بڑی امریکی ٹیکنالوجی کمپنیوں کو ہدف بنائیں گے۔

بیان میں کہا گیا ہے کہ ”یہ کمپنیاں بدھ یکم اپریل کو تہران کے وقت کے مطابق رات 8 بجے (1630 جی ایم ٹی) سے ایران میں ہر قتل کے بدلے اپنی متعلقہ تنصیبات کی تباہی کی توقع رکھیں۔“ پاسداران نے 18 کمپنیوں کے نام بھی درج کیے جن پر ان کے بقول حکام کے قتل میں ملوث ہونے کا الزام ہے۔

انہوں نے مزید کہا کہ ”ہم ان اداروں کے ملازمین کو مشورہ دیتے ہیں کہ وہ اپنی جانوں کے تحفظ کے لیے فوری طور پر اپنے کام کی جگہیں چھوڑ دیں۔“

یہ دھمکی ایسے وقت میں سامنے آئی ہے جب صدر ڈونلڈ ٹرمپ کا کہنا ہے کہ وہ تنازع کے خاتمے کے لیے سفارتی کوششیں کر رہے ہیں، تاہم ساتھ ہی انہوں نے اسلامی جمہوریہ کے خلاف امریکہ-اسرائیل مہم کو مزید تیز کرنے کی دھمکی بھی دی ہے۔

پاسداران کے بیان میں کہا گیا کہ امریکی حکومت اور بڑی ٹیک کمپنیوں نے اعلیٰ ایرانی حکام کو نشانہ بنانے والی کارروائیوں کو روکنے کی ”ضرورت سے متعلق ہماری بارہا وارننگز کو نظر انداز کیا“، اور الزام لگایا کہ یہ ٹیک فرمیں ”قتل کے اہداف کی منصوبہ بندی اور ان کی نگرانی میں بنیادی کردار“ ادا کر رہی ہیں۔

بیان میں کہا گیا کہ اس کے نتیجے میں ان 18 کمپنیوں، جن میں انٹیل، مائیکروسافٹ اور اوریکل کے علاوہ الیکٹرک کار کمپنی ٹیسلا، اینالیٹکس فرم پالینٹیر اور چِپ بنانے والی بڑی کمپنی اینویڈیا بھی شامل ہیں، کو جوابی کارروائی کا خطرہ لاحق ہے۔

بیان میں مزید کہا گیا ہے کہ ”وہ کمپنیاں جو دہشت گردانہ منصوبوں میں فعال کردار ادا کریں گی، انہیں ہر ٹارگٹڈ قتل کے بدلے جوابی کارروائی کا سامنا کرنا پڑے گا۔“

سپریم لیڈر علی خامنہ ای اور پاسدارانِ انقلاب کے کمانڈر اِن چیف محمد پاکپور 28 فروری کو جنگ کے پہلے ہی دن مارے گئے، جبکہ امریکہ اور اسرائیل ایرانی قیادت کی پوری صفِ اول کو نشانہ بنانے کے درپے تھے۔

اسلامی جمہوریہ کے طاقتور سیکیورٹی سربراہ علی لاریجانی بھی مارے جا چکے ہیں، جبکہ دیگر کئی اہم شخصیات بھی ہلاک ہو چکی ہیں۔

اسرائیل اور امریکہ کا کہنا ہے کہ اعلیٰ حکام کو ہلاک کر کے انہوں نے ایران کو بڑا دھچکا پہنچایا ہے، تاہم بعض تجزیہ کاروں کے مطابق اسلامی جمہوریہ مشکلات کے باوجود خود کو سنبھالنے اور بحالی کی صلاحیت کا مظاہرہ کر رہا ہے۔