پاکستان اور افغانستان کے درمیان فائرنگ کا تبادلہ، اسلام آباد امریکہ ایران مذاکرات کی میزبانی کے لیے تیار

پاکستان اور افغانستان کے درمیان شدید فائرنگ کا تبادلہ ہوا ہے، دونوں ممالک کے مطابق یہ جھڑپیں لڑائی میں عارضی وقفے کے اعلان کے چند روز بعد ہوئی ہیں۔ اس پیش رفت سے خطے میں کشیدگی میں ایک ایسے وقت میں اضافہ ہوا ہے جب اسلام آباد نے امریکہ اور ایران کے درمیان ممکنہ مذاکرات کی میزبانی کی امید ظاہر کی ہے۔

سرحدی جھڑپوں کا یہ واقعہ اتوار کو پیش آیا، جب پاکستان نے مشرقِ وسطیٰ کی جنگ میں تناؤ کم کرنے کے لیے علاقائی طاقتوں کی میزبانی کی اور یہ اعلان کیا کہ اسلام آباد آنے والے دنوں میں مذاکرات منعقد کرا سکتا ہے۔ حکام کے مطابق دونوں جانب سے توپ خانے اور بھاری ہتھیاروں کا استعمال کیا گیا، جس میں افغانستان کے صوبہ کنڑ اور پاکستان کے سرحدی ضلع باجوڑ میں مقامات کو نشانہ بنایا گیا۔

کابل کی طالبان انتظامیہ کے نائب ترجمان حمد اللہ فطرت نے دعویٰ کیا ہے کہ پاکستان کی فائرنگ سے کم از کم ایک شخص جاں بحق اور 16 زخمی ہوئے، جن میں اکثریت خواتین اور بچوں کی ہے۔

دوسری جانب پاکستانی سیکیورٹی حکام نے کہا کہ پاکستان نے صرف افغان گولہ باری کا جواب دیا اور شہری آبادی کو نشانہ بنانے کی تردید کی۔ ایک سرکاری اہلکار نے افغان دعوے کو مبالغہ آرائی قرار دیتے ہوئے کہا کہ سرحد پار سے ہونے والی معمولی خلاف ورزیوں کا اسی سیکٹر میں جواب دیا گیا۔

پاکستان اور افغانستان کے درمیان حالیہ برسوں کی بدترین لڑائی گزشتہ ماہ شروع ہوئی تھی جس میں دونوں جانب بھاری جانی نقصان ہوا۔ کابل نے دعویٰ کیا تھا کہ افغان دارالحکومت میں ایک مرکز پر پاکستانی فضائی حملے میں 400 سے زائد افراد جاں بحق ہوئے، تاہم پاکستان نے اسے مسترد کرتے ہوئے کہا کہ صرف فوجی تنصیبات اور دہشت گردوں کے انفرااسٹرکچر کو نشانہ بنایا گیا۔ عید الفطر کے موقع پر ترکیہ، قطر اور سعودی عرب کی درخواست پر کیا گیا جنگ بندی کا معاہدہ اسلام آباد نے گزشتہ ہفتے ختم کر دیا تھا، جبکہ کابل نے ابھی تک اس پر اپنا باضابطہ موقف ظاہر نہیں کیا۔

اسلام آباد افغان طالبان پر عسکریت پسندوں کو پناہ دینے کا الزام لگاتا ہے، جبکہ کابل اسے پاکستان کا اندرونی مسئلہ قرار دیتا ہے۔