کئیراینڈ کسٹڈی لاگت 9 ملین ڈالر تک محدود، کاسا 1000 منصوبے میں 27 ملین ڈالر کی بچت

پاکستان نے کاسا-1000 منصوبے میں ایک بڑی مالی کامیابی حاصل کی ہے اور ٹھیکیدار کے دعوؤں پر کامیاب مذاکرات کے بعد 27 ملین امریکی ڈالر سے زائد کی بچت کی ہے۔

وزارت توانائی (پاور ڈویژن) کے مطابق ای پی سی کنٹریکٹر، ہیتاچی–کوبرا جوائنٹ وینچر نے پاکستان کے لیے تقریباً 32.9 ملین امریکی ڈالر اور تاجکستان کے لیے 28.5 ملین امریکی ڈالر کے کئیراینڈ کسٹڈی دعوے پیش کیے تھے۔

9 تا 10 مارچ 2026 کو سویڈن کے شہر لوڈویکا میں ہونے والی اعلیٰ سطح میٹنگ میں وزارت توانائی کے ایڈیشنل سیکرٹری سید امتیاز حسین شاہ اور نیشنل گرڈ کمپنی کے منیجنگ ڈائریکٹر الطاف حسین نے شرکت کی، جس کے نتیجے میں مذاکرات کامیاب رہے۔

فریقین نے اتفاق کیا کہ کئیراینڈ کسٹڈی لاگت کو مجموعی طور پر 9.0 ملین امریکی ڈالر تک محدود کیا جائے، جو پاکستان اور تاجکستان کے درمیان تقسیم ہوگی، اور یہ رقم فروری 2028 تک لاگو ہوگی۔ اس فیصلے سے پاکستان کے لیے 27 ملین امریکی ڈالر سے زائد کی بچت ہوئی، جبکہ اہم ایچ وی ڈی سی اثاثوں کی صحت، سالمیت اور عملی تیاری کو عارضی مدت کے دوران یقینی بنایا گیا۔ اگر ضرورت پڑی تو فروری 2028 کے بعد تین ماہ تک محدود توسیع بھی منظور کی گئی ہے، جس پر ماہانہ 5 فیصد اضافہ لاگو ہوگا۔

کاسا-1000 منصوبہ، جو وسطی ایشیا کو جنوبی ایشیا کے ساتھ بجلی کے تجارتی تعلقات کے لیے جوڑتا ہے، افغانستان میں جغرافیائی سیاسی صورتحال کی وجہ سے تاخیر کا شکار رہا ہے۔ نتیجتاً ایچ وی ڈی سی سسٹم کی کمیشننگ اب ستمبر 2027 تک متوقع ہے، جس کے لیے عارضی کئیراینڈ کسٹڈی انتظامات کی ضرورت ہوگی۔

کاپی رائٹ بزنس ریکارڈر، 2026