عالمی مارکیٹ میں سونا مسلسل تیسرے ہفتے گراوٹ کا شکار، ڈالر کی قدر میں اضافہ برقرار

سونے کی قیمتوں میں جمعہ کو تکنیکی خریداری کے اثر سے اضافہ دیکھنے میں آیا، تاہم یہ لگاتار تیسرے ہفتے کمی کے راستے پر تھی، جس کی وجہ مضبوط امریکی ڈالر اور سخت گیر امریکی فیڈرل ریزرو کے باعث قریبی مدت میں شرح سود میں کمی کی امیدوں میں کمی تھی۔

اسپاٹ گولڈ 1.1 فیصد بڑھ کر 4,700.97 ڈالر فی اونس پر پہنچ گیا، پچھلے سیشن میں لگ بھگ دو ماہ کی کم ترین سطح سے بحالی دکھائی۔ اپریل کی ڈیلیوری کے لیے امریکی سونے کی فیوچرز 2.1 فیصد بڑھ کر 4,701.30 ڈالر ہو گئی۔

ای بی سی ریفائنری کے عالمی ادارہ جاتی مارکیٹس کے سربراہ نکولس فرایپل نے کہا کہ سونے نے ہفتہ وار ٹائم فریم میں اہم تکنیکی سپورٹ برقرار رکھی، اور گولڈ ممکنہ طور پر اس سطح تک بحالی دکھا سکتا ہے جہاں یہ ٹوٹا تھا، یعنی تقریباً 4,800 ڈالر پر۔

تاہم اس ہفتے سونے کی قیمت میں اب تک 6 فیصد سے زائد کمی ہو چکی ہے، اور 28 فروری کو امریکا اور اسرائیل کے ایران پر حملے کے بعد اسپاٹ گولڈ میں 10 فیصد سے زائد کمی آئی ہے۔ امریکی ڈالر اس دوران سب سے واضح محفوظ پناہ کے اثاثے کے طور پر ابھرا ہے، جو اس ماہ اب تک 2 فیصد سے زیادہ مضبوط ہوا۔

فیڈ نے بدھ کو شرح سود برقرار رکھی، اور دیگر ترقی یافتہ مارکیٹوں کے مرکزی بینکوں کی طرح کہا کہ افراط زر بڑھ سکتی ہے۔ شرح سود کی فیوچرز مارکیٹ کے مطابق اس سال فیڈ کی کسی کمی کے امکانات نہ کے برابر ہیں۔

تیل کی قیمتیں جمعہ کو 105 ڈالر فی بیرل سے اوپر رہی، جب کہ ایران نے خلیج میں توانائی کے اہداف پر حملہ کیا، جس کے بعد امریکی صدر ڈونلڈ ٹرمپ نے اسرائیل کو حملے دہرانے سے روک دیا اور امریکی وزیر خزانہ اسکاٹ بیسنٹ نے کہا کہ امریکا جلد ہی ٹینکروں میں موجود ایرانی تیل پر پابندیاں ہٹا سکتا ہے اور اسٹریٹجک پیٹرولیم ریزرو سے مزید خام تیل جاری کیا جا سکتا ہے۔

چاندی کی قیمتیں 1.5 فیصد بڑھ کر 73.91 ڈالر فی اونس، پلاٹینم 1.9 فیصد بڑھ کر 2,008.85 ڈالر، اور پیلاڈیم 1.2 فیصد بڑھ کر 1,463.75 ڈالر فی اونس ہو گئی ہیں۔