مہدی حسن معراج کے متنازع رن آؤٹ نے اسپورٹس مین اسپرٹ کی بحث چھیڑ دی

پاکستانی بیٹر سلمان علی آغا کا کہنا ہے کہ بنگلہ دیشی کپتان مہدی حسن معراج کو اسپورٹس مین اسپرٹ کا مظاہرہ کرنا چاہیے تھا۔ انہوں نے یہ بات ڈھاکہ ون ڈے میں ایک متنازع رن آؤٹ کے ذریعے اپنی اننگز کے خاتمے پر کہی۔

واقعہ کچھ یوں ہوا کہ نان اسٹرائیکر اینڈ پر موجود سلمان آغا کریز سے تھوڑا باہر تھے، وہ اپنے ساتھی کھلاڑی محمد رضوان کی جانب سے ہٹ کی گئی گیند کو پکڑ کر باؤلر کو واپس کرنے کے لیے نیچے جھکے۔ تاہم مہدی حسن معراج نے پھرتی دکھاتے ہوئے سلمان آغا کے پیچھے سے گھوم کر گیند پکڑی اور وکٹوں پر دے ماری۔

اس آؤٹ نے فوری طور پر کھیل کی اسپرٹ کے بارے میں بحث چھیڑ دی، جس نے 2023 کی ایشز سیریز کے اس متنازع واقعے کی یاد تازہ کر دی جب آسٹریلیا کے ایلکس کیری نے لارڈز کے میدان پر انگلینڈ کے جونی بیئرسٹو کو اسٹمپ کیا تھا۔

پاکستان کی 128 رنز سے جیت کے بعد صحافیوں سے گفتگو کرتے ہوئے سلمان آغا نے کہا کہ میرا خیال ہے کہ اسپورٹس مین اسپرٹ ہونی چاہیے۔ انہوں نے جو کیا وہ قانون کے دائرے میں تو ہے اگر وہ اسے درست سمجھتے ہیں تو ٹھیک ہے لیکن اگر آپ میرے رائے پوچھیں تو میں کچھ الگ کرتا، میں کھیل کے جذبے کو ترجیح دیتا۔

سلمان آغا نے اس وقت غصے کا اظہار کرتے ہوئے اپنے دستانے اور ہیلمٹ زمین پر دے مارے تھے، تاہم بعد میں انہوں نے اپنے اس ردِعمل کو معمولی قرار دیا۔ انہوں نے وضاحت کی کہ میں صرف انہیں گیند واپس دینے کی کوشش کر رہا تھا۔ میں کوئی رن لینے کی کوشش نہیں کر رہا تھا لیکن وہ پہلے ہی فیصلہ کر چکے تھے۔ جو کچھ بھی ہوا وہ بس اس وقت کے جوش میں تھا۔

پاکستان اور بنگلہ دیش کے درمیان تیسرا ون ڈے جاری ہے، جس میں تین میچوں کی سیریز 1-1 سے برابر ہے۔