بحیرہ جنوبی چین میں فلپائن، امریکا اور جاپان کی مشترکہ فوجی مشقیں

فلپائن، امریکا اور جاپان کی بحری افواج نے اس ہفتے بحیرہ جنوبی چین میں مشترکہ مشقیں کیں، جن کا مقصد فوجی اتحادیوں کے درمیان تعاون کو مزید مضبوط بنانا تھا۔ فلپائن کی مسلح افواج نے جمعہ کو جاری بیان میں کہا کہ یہ سرگرمی خطے میں باہمی رابطے، بحری سلامتی اور میری ٹائم ڈومین آگاہی کو بہتر بنانے کے عزم کی عکاسی کرتی ہے۔

بحیرہ جنوبی چین وسائل سے مالا مال سمندری گزرگاہ ہے جس پر چین اپنی تاریخی ملکیت کا دعویٰ کرتا ہے، تاہم 2016 کے ثالثی فیصلے میں ان دعوؤں کو مسترد کر دیا گیا تھا۔ 2023 سے فلپائن مختلف ممالک کے ساتھ مل کر اس علاقے میں اپنے بحری حقوق اور دعوؤں کے تحفظ کے لیے سرگرم عمل ہے۔

مشترکہ مشقوں میں فلپائن نے اپنا فریگیٹ انتونیو لونا، ہیلی کاپٹرز اور لڑاکا طیارے تعینات کیے۔ جاپان نے پی-3 اورین طیارہ بھیجا جبکہ امریکا نے گائیڈڈ میزائل ڈسٹرائر یو ایس ایس ڈیوے اور پی-8 پوسائیڈن طیارہ روانہ کیا ہے۔

مشقوں میں سمندر میں رسد کی فراہمی، مشترکہ فضائی گشت، فلائی بائی اور مواصلاتی جانچ کی سرگرمیاں شامل تھیں۔ اس سے قبل فلپائن نے 15 اور 16 فروری کو امریکا اور آسٹریلیا کے ساتھ بھی اسی نوعیت کی مشقیں انجام دی تھیں، جس سے خطے میں سکیورٹی تعاون میں اضافہ ظاہر ہوتا ہے۔