امریکی ٹیرف پر غیر یقینی، محفوظ سرمایہ کاری کی طلب بڑھنے سے سونا مہنگا ہوگیا

عالمی منڈی میں سونے کی قیمتوں میں بدھ کے روز اضافہ دیکھا گیا، جب ایشیائی تجارت کے دوران سرمایہ کار غیر یقینی صورتحال کے پیش نظر محفوظ سرمایہ کاری کے طور پر سونے کی جانب متوجہ ہوئے۔ امریکی سپریم کورٹ کی جانب سے صدر ٹرمپ کے متعدد ٹیرف اقدامات کالعدم قرار دیے جانے کے بعد امریکی تجارتی پالیسی سے متعلق ابہام بڑھ گیا ہے۔

اسپاٹ گولڈ کی قیمت 0.5 فیصد اضافے کے ساتھ 5,174.76 ڈالر فی اونس تک پہنچ گئی۔ گزشتہ سیشن میں سونا ایک فیصد سے زائد گر گیا تھا کیونکہ سرمایہ کاروں نے تین ہفتوں کی بلند ترین سطح چھونے کے بعد منافع سمیٹا تھا۔ اپریل ڈیلیوری کے لیے امریکی گولڈ فیوچرز 0.3 فیصد اضافے کے ساتھ 5,192.20 ڈالر فی اونس پر ٹریڈ کرتے رہے۔

امریکہ نے منگل سے عارضی طور پر 10 فیصد عالمی درآمدی ٹیرف کا نفاذ شروع کیا ہے، تاہم وائٹ ہاؤس کے ایک عہدیدار کے مطابق اسے 15 فیصد تک بڑھانے پر بھی غور کیا جا رہا ہے۔ اس پیش رفت نے تجارتی پالیسی کے حوالے سے مزید غیر یقینی پیدا کر دی ہے۔

ادھر فیڈرل ریزرو کے دو عہدیداروں نے عندیہ دیا ہے کہ فی الحال شرح سود میں فوری تبدیلی کا امکان نہیں۔ مارکیٹس کو توقع ہے کہ رواں برس تین مرتبہ 25 بیسس پوائنٹس کی کمی کی جا سکتی ہے۔

تجزیہ کاروں کے مطابق اگر امریکی مالیاتی اور خارجہ پالیسی سے متعلق خدشات برقرار رہے تو سونے کی قیمتوں میں مزید اضافے کی گنجائش موجود ہے۔ تکنیکی ماہرین کا کہنا ہے کہ سونا 5,140 ڈالر کی سپورٹ سطح کے قریب مستحکم ہو سکتا ہے جبکہ 5,205 ڈالر کی مزاحمتی حد عبور کرنے کی صورت میں قیمت 5,221 سے 5,244 ڈالر کی حد تک جا سکتی ہے۔

دوسری قیمتی دھاتوں میں چاندی ایک فیصد اضافے سے 88.23 ڈالر فی اونس، پلاٹینم 2.1 فیصد اضافے سے 2,212.72 ڈالر اور پیلیڈیم 1.4 فیصد بڑھ کر 1,793.68 ڈالر فی اونس ہو گیا۔