کراچی کے مختلف علاقوں میں بارش اور ژالہ باری، موسم خوشگوار ہو گیا

محکمہ موسمیات (پی ایم ڈی) کے مطابق منگل کو کراچی کے مختلف علاقوں میں ہلکی سے معتدل بارش اور ژالہ باری (اولے پڑنے) کی اطلاعات موصول ہوئی ہیں۔

بارش کے بعد شہر کا موسم خوشگوار ہو گیا ۔ گلستانِ جوہر، نارتھ ناظم آباد، فیڈرل بی ایریا، یونیورسٹی روڈ، اورنگی ٹاؤن، سائٹ ایریا اور بفر زون سمیت متعدد علاقوں میں بارش ہوئی۔

دریں اثنا اسکیم 33 اور اس کے گردونواح میں بارش کے دوران ژالہ باری بھی دیکھی گئی۔

ملیر ہالٹ، رفاع عام سوسائٹی اور ملحقہ علاقوں میں تیز ہواؤں کے ساتھ ہلکی بارش کا آغاز ہو گیا ہے۔ محکمہ موسمیات کے مطابق ساحلی شہر کے مختلف حصوں میں آج شام تک وقفے وقفے سے ہلکی بارش کا سلسلہ جاری رہنے کا امکان ہے۔

دوسری جانب کے الیکٹرک کے ترجمان نے شہریوں پر زور دیا ہے کہ وہ تیز ہواؤں اور بارش کے دوران برقی آلات کے استعمال میں احتیاط برتیں۔ ترجمان نے خبردار کیا کہ غیر قانونی کنکشنز (کنڈوں) کا استعمال جان لیوا حادثات کا سبب بن سکتا ہے۔

اہلکار کا کہنا تھا کہ بارش کے موسم میں کسی بھی ناخوشگوار واقعے سے بچنے کے لیے حفاظتی تدابیر اختیار کریں۔ ان تجویز کردہ حفاظتی اقدامات کو اپنے پیاروں کے ساتھ بھی شیئر کریں۔

ترجمان نے مزید بتایا کہ حفاظتی اقدام کے طور پر بعض نشیبی علاقوں میں پانی جمع ہونے کی وجہ سے بجلی کی فراہمی عارضی طور پر معطل کر دی گئی ہے۔ اہلکار نے مزید کہا کہ کے الیکٹرک اس وقت صورتحال کی نگرانی کر رہی ہے اور فیلڈ اسٹاف ہائی الرٹ پر ہے۔