محمد امین راجپوت ایس ایس جی سی کے عبوری ایم ڈی اور سی ای او تعینات

سوئی سدرن گیس کمپنی (ایس ایس جی سی) نے جمعہ کو محمد امین راجپوت کی بطور منیجنگ ڈائریکٹر اور سی ای او تقرری کا اعلان کیا ہے جو 3 ماہ کی عبوری مدت کے لیے اپنی خدمات انجام دیں گے۔

ایس ایس جی سی نے پاکستان اسٹاک ایکسچینج کو بھیجے گئے ایک نوٹس کے ذریعے اس پیشرفت سے آگاہ کیا۔

نوٹس کے مطابق قائم مقام منیجنگ ڈائریکٹر/ سی ای او محمد امین راجپوت ریٹائرمنٹ کی عمر کو پہنچ رہے ہیں اور 13 فروری 2026 کو کمپنی کی مستقل سروس سے ریٹائر ہوجائیں گے۔

کمپنی نے مطلع کیا کہ مستقل منیجنگ ڈائریکٹر/سی ای او کی تقرری کا باضابطہ عمل جاری رہنے کے دوران قیادت کے تسلسل کو یقینی بنانے کیلئے امین راجپوت کو ان کی ریٹائرمنٹ کے فوراً بعد تین ماہ کی مدت کے لیے عبوری منیجنگ ڈائریکٹر/سی ای او مقرر کیا گیا ہے۔

راجپوت کے پاس آئل اینڈ گیس، توانائی، مینوفیکچرنگ اور آٹوموبائل کے شعبوں میں فنانس، آڈٹ اور مینجمنٹ کا 30 سال سے زائد کا متنوع تجربہ ہے۔

ایس ایس جی سی میں شمولیت سے قبل وہ کے الیکٹرک میں چیف انٹرنل آڈیٹر کے طور پر اور سعودی عرب کی کمپنی زاہد ٹریکٹر (وولوو اور کیٹرپلر) میں فنانس اور آڈٹ کے مختلف عہدوں پر خدمات انجام دے چکے ہیں۔

وہ فیلو چارٹرڈ اکاؤنٹنٹ اور سرٹیفائیڈ انٹرنل آڈیٹر ہیں۔