ٹی ٹوئنٹی ورلڈ کپ: نمیبیا کے خلاف میچ سے قبل بھارتی اوپنر ابھیشیک شرما اسپتال میں داخل
- امکان ظاہر کیا جارہا ہے کہ وہ ٹی ٹوئنٹی ورلڈ کپ میں نمیبیا کے خلاف گروپ میچ میں حصہ نہیں لے سکیں گے
بھارتی کرکٹ ٹیم کے اوپننگ بیٹر ابھیشیک شرما کو معدے کے انفیکشن کے باعث اسپتال میں داخل کر دیا گیا، امکان ظاہر کیا جارہا ہے کہ وہ ٹی ٹوئنٹی ورلڈ کپ میں نمیبیا کے خلاف گروپ میچ میں حصہ نہیں لے سکیں گے۔
کرکٹ بورڈ کے اہلکار نے نام ظاہر نہ کرنے کی شرط پر اے ایف پی کو بتایا کہ 25 سالہ کھلاڑی کو منگل کو دہلی کے ایک اسپتال میں داخل کیا گیا تھا۔
ابھیشیک شرما کی طبیعت امریکا کے خلاف پچھلے میچ سے پہلے ہی خراب تھی، تاہم میچ کھیلنے کے بعد ان کی حالت مزید بگڑگئی۔
رپورٹ میں بتایا گیا کہ ابھیشیک شرما کو تیز بخار تھا اور فوری طبی امداد کے طور پر انہیں ڈرپس لگائی گئیں۔ اسی وجہ سے وہ نئی دہلی کے ارون جیٹلی اسٹیڈیم میں ہونے والے ٹیم کے پریکٹس سیشن میں بھی شریک نہیں ہو سکے۔
رپورٹ کے مطابق انہیں دہلی کے ایک نجی اسپتال میں داخل کیا گیا ہے جہاں مختلف طبی ٹیسٹ کیے جا رہے ہیں تاکہ بیماری کی اصل وجہ معلوم کی جا سکے۔
فی الحال یہ واضح نہیں ہوسکا کہ انہیں کب اسپتال سے ڈسچارج کیا جائے گا تاہم نمیبیا کے خلاف میچ میں ان کی شرکت مشکوک قرار دی جارہی ہے۔
بھارتی ٹیم کے اسسٹنٹ کوچ ریان ٹین ڈوشیٹ نے میڈیا سے گفتگو کرتے ہوئے کہا کہ ابھیشیک کو معدے سے متعلق کچھ مسائل اب بھی درپیش ہیں، تاہم امید ہے کہ دو دن میں وہ میچ کے لیے دستیاب ہو سکتے ہیں۔
Comments