سی ای او کا استعفیٰ: کے الیکٹرک نے بورڈ آف ڈائریکٹرز کا اجلاس ری شیڈول کردیا

کےالیکٹرک نے پیر کو اعلان کیا کہ کمپنی کے بورڈ آف ڈائریکٹرز کا اجلاس جس میں مالی نتائج کے علاوہ دیگر معاملات پر غور کیا جانا تھا ری شیڈول (تبدیل) کردیا گیا ہے۔

کمپنی نے پاکستان اسٹاک ایکسچینج کو اس فیصلے سے آگاہ کر دیا ہے۔

اب یہ اجلاس 13 فروری کو دوپہر 12 بجے کراچی میں منعقد ہوگا۔

چیف ایگزیکٹو آفیسر (سی ای او) مونس علوی نے جمعہ کو اپنے عہدے سے استعفیٰ دے دیا تھا۔ یہ استعفیٰ ایسے وقت میں سامنے آیا جب گورنر سندھ کامران ٹیسوری نے صوبائی محتسب کے اس حکم کو منسوخ کردیا تھا جس میں کام کی جگہ پر ہراسانی کے مبینہ کیس میں ملوث ہونے پر علوی کو ان کے عہدے سے ہٹانے کا حکم دیا گیا تھا۔

مونس علوی نے اپنے استعفے کا اعلان سوشل میڈیا پلیٹ فارم ایکس پر ایک پوسٹ کے ذریعے کیا۔

انہوں نے لکھا کہ کے الیکٹرک کے ساتھ 18 سال جن میں تقریباً 8 سال بطور سی ای او شامل ہیں، گزارنے کے بعد اب میں نے عہدہ چھوڑنے کا فیصلہ کرلیا ہے۔

انہوں نے لکھا کہ کراچی کی زندگی کیلئے کلیدی اہمیت رکھنے والے اس ادارے کی خدمت کرنا میرے لیے اعزاز کی بات ہے اور یہ سفر میں نے ان چند انتہائی باہمت اور پرعزم پیشہ ور افراد کے ساتھ طے کیا ہے جنہیں میں جانتا ہوں۔ میں (قیادت کی) پرامن اور ہموار منتقلی میں مکمل تعاون کروں گا۔

ان کے استعفے کے بعد یوٹیلیٹی کمپنی نے اپنے جانشین کا فیصلہ کرنے کیلئے بروز منگل (10 فروری) کو ایک اجلاس طلب کر رکھا تھا۔ ذرائع کے مطابق اس عہدے کے لیے تین امیدواروں کو شارٹ لسٹ کیا گیا ہے۔