آسٹریلوی فاسٹ بولر ہیزل ووڈ ٹی 20 ورلڈ کپ سے باہر ہو گئے

آسٹریلوی فاسٹ بولر جوش ہیزل ووڈ ٹی 20 ورلڈ کپ سے باہر ہو گئے جو کہ فٹنس حاصل کرنے کی کوشش میں ناکامی کے بعد ٹیم کے لیے ایک بڑا دھچکا ہے۔

ہیزل ووڈ ہیمسٹرنگ اور ایڑی کی انجری کے باعث ایشز سیریز نہیں کھیل سکے تھے، تاہم یہ توقع کی جا رہی تھی کہ وہ بھارت اور سری لنکا میں ہونے والے ورلڈ کپ کا کم از کم کچھ حصہ ضرور کھیلیں گے۔

سلیکٹر ٹونی ڈوڈیمائڈ نے جمعہ کو بتایا ہمیں امید تھی کہ جوش ’سپر 8‘ مرحلے تک میچ فٹنس حاصل کر لیں گے، لیکن تازہ ترین علامات کے مطابق وہ ابھی فٹنس سے دور ہیں اور ان کے ریکوری پروگرام میں تیزی لانا بہت زیادہ خطرے کا باعث بنے گا۔

کرکٹ آسٹریلیا کے ایک بیان میں انہوں نے مزید کہا کہ ہم فوری طور پر کسی متبادل کھلاڑی کا اعلان نہیں کریں گے۔ ہمارا خیال ہے کہ ابتدائی میچوں کے لیے ہمارے پاس کافی کھلاڑی موجود ہیں، اس لیے بعد میں ضرورت کی بنیاد پر کوئی فیصلہ کریں گے۔

مچل اسٹارک کی ٹی 20 سے ریٹائرمنٹ اور پیٹ کمنز کے کمر کی تکلیف کے باعث باہر ہونے کے بعد ایک دہائی سے زائد عرصے میں یہ پہلا ورلڈ کپ ہوگا جس میں آسٹریلیا کی مشہور پیس ٹریو (تین بہترین فاسٹ بولرز) میں سے کوئی ایک بھی شامل نہیں ہوگا۔

کرکٹ آسٹریلیا کا کہنا ہے کہ فاسٹ بولر نیتھن ایلس اور بلے باز ٹم ڈیوڈ گروپ مرحلے کے لیے دستیاب ہوں گے، جبکہ لیگ اسپنر ایڈم زیمپا اگلے ہفتے کولمبو میں آئرلینڈ کے خلاف پہلے میچ کے لیے دستیاب ہوں گے۔