پی ایس ایل 11، حیدرآباد اپنی ٹیم 7 فروری کو متعارف کروانے کے لیے تیار

پاکستان سپر لیگ (پی ایس ایل) کی حیدرآباد فرنچائز کو باقاعدہ طور پر 7 فروری کو حیدرآباد کے نیاز اسٹیڈیم میں لانچ کیا جائے گا، جس کا اعلان منتظمین کی جانب سے کیا گیا ہے۔اس افتتاحی تقریب کے دوران حیدرآباد کی ٹیم اپنے سرکاری نام اور لوگو کی نقاب کشائی کرے گی، جو پی ایس ایل میں اس کی باضابطہ شمولیت کا اعلان ہوگا۔

لانچ کی سرگرمیوں کے سلسلے میں کراچی سے حیدرآباد تک ایک ریلی بھی نکالی جائے گی، تاکہ نئی فرنچائز کا جشن منایا اور خطے کے کرکٹ شائقین کو اس میں شریک کیا جا سکے۔

منتظمین کا کہنا ہے کہ اس تقریب میں لائیو کنسرٹ اور آتش بازی کا شاندار مظاہرہ بھی کیا جائے گا۔ حیدرآباد سے تعلق رکھنے والے نامور گلوکار سیف سمیجو اس تقریب میں اپنی پرفارمنس پیش کریں گے۔

حیدرآباد فرنچائز کے اضافے سے لیگ کے دائرہ کار اور مداحوں کی تعداد میں مزید اضافے کی توقع ہے، جس سے سندھ کے شائقین کو کرکٹ کے اعلیٰ درجے کے مقابلے اپنے قریب دیکھنے کا موقع ملے گا۔